Ադրբեջանում Ուկրաինայի հարցով բանակցություններ անցկացնելու մասին դեռևս խոսք չկա․ Պեսկով

Այս պահին Ադրբեջանը որպես ուկրաինական կարգավորման շուրջ բանակցությունների հարթակ օգտագործելու մասին որևէ խոսք չկա. ինչպես գրում է ТАСС-ը, այդ մասին հայտարարել է Ռուսաստանի նախագահի մամուլի քարտուղար Դմիտրի Պեսկովը՝ մեկնաբանելով Վլադիմիր Զելենսկու հայտարարությունն Ադրբեջանը որպես բանակցությունների հարթակ օգտագործելու պատրաստակամության մասին։

Հիշեցնենք, որ Ուկրաինայի նախագահ Վլադիմիր Զելենսկին օրեր առաջ մեկնել էր Ադրբեջան, որտեղ ադրբեջանցի գործընկերոջ հետ ստորագրել է անվտանգության և էներգետիկ ոլորտում համագործակցության վերաբերյալ համաձայնագրեր։

Ադրբեջանի նախագահ Իլհամ Ալիևը հայտարարել է, որ երկու երկրների միջև ռազմաարդյունաբերական գործընկերությունը «լայն հեռանկարներ» ունի։