Փաշինյանից առաջարկ չեմ ստացել, լինի՝ կմտածեմ․ Ալեն Սիմոնյանի ճեպազրույցը՝ կետերով

ԱԺ նախագահ Ալեն Սիմոնյանը խորհրդարանում ճեպազրույց է տվել՝ խոսելով նոր գումարման խորհրդարանում մանդատից հրաժարվելու, իրեն փոխարինողի, օրենսդիր մարմնի ղեկավարի պաշտոնում չընտրվելու և այլ հարցերի մասին։

Ալեն Սիմոնյանի ճեպազրույցի առանցքային կետերը ներկայացնում ենք ստորև․

• Չեմ վերցնի մանդատը, չեմ գա Ազգային ժողով որպես պատգամավոր, ուզում եմ մի քիչ հանգստանալ և կարգավորել անձնական կյանքս։
• Ոչ մի պաշտոն հավերժ չի և փառք Աստծո։
• Ռուբեն Ռուբինյանն ամենալավ թեկնածուն էր, որ կարող էր ինձ փոխարինել։ Նա իմ ընկերն է, ես իրեն շարունակում եմ համարել իմ ընկերը։
• Ես շարունակելու եմ ակտիվ քաղաքական գործիչ լինել, ես քաղաքականությունից չեմ հեռանալու, քաղաքականության էջը չեմ փակում։
• Ես ինձ առանց Նիկոլ Փաշինյանի և «Քաղաքացիական պայմանագրի» որևէ քաղաքական պրոցեսում չեմ տեսնում։
• Ես կայացած քաղաքական գործիչ եմ, բայց ես քաղաքական գործիչ եմ իմ թիմի հետ միասին։
• Նիկոլ Փաշինյանից առաջարկ չեմ ստացել։ Երբ առաջարկ լինի, կմտածեմ։
• Ութ տարի առաջնագծում «ավտոմատը» ձեռքս կանգնած եմ եղել, կլինի՞ մի քիչ հանգստանամ։
• Մնալու եմ իմ ընկերների կողքին այնքան ժամանակ, ինչքան պետք լինեմ։