Ի՞նչ է կատարվում Արարատյան թեմի երիտասարդաց միությունում և ինչո՞ւ չեն մասնակցել Վարդավառի տոնին
Արարատյան հայրապետական թեմի երիտասարդաց միությունները չեն լուծարվել․ ABC Media-ի հետ զրույցում տեղեկացրել է Հայ Առաքելական Եկեղեցու Արարատյան հայրապետական թեմի տեղեկատվական բաժնի ղեկավար Նոյեմի Անդրեասյանը՝ հերքելով լրատվամիջոցներում տարածված տեղեկությունները։
«Արարատյան հայրապետական թեմի երիտասարդաց միությունները գտնվում են վերակազմավորման փուլում։ Դրա պատճառները մի քանիսն են։ Դրանցից մեկն այն է, որ երիտասարդաց միությունների հոգևոր հովիվը սեփական դիմումի համաձայն խնդրել է իրեն ազատել այդ պարտականություններից, քանի որ արդեն տարիքն առել էր և հանգստի կարիք ուներ։ Դրանից հետո նշանակվել է նոր հոգևոր հովիվ»,- նշել է Անդրեասյանը։
Նրա խոսքով՝ հովվի փոփոխությունից հետո, դեռ անցած տարվանից, երիտասարդաց միությունները վերակազմավորման գործընթացում են, և դա որևէ կապ չունի երեկ նշված Վարդավառի տոնին չմասնակցելու հետ։
«Վարդավառի տոնին նվիրված միջոցառումը կազմակերպել է Երևանի քաղաքապետարանը, և Արարատյան հայրապետական թեմի երիտասարդաց միությունները դրա հետ առնչություն չունեն։ Բացի այդ, առաջին անգամ չէ, որ նրանք չեն մասնակցում այդ միջոցառմանը»,- ասել է Արարատյան հայրապետական թեմի տեղեկատվական բաժնի ղեկավարը։
