Ի՞նչ կապ ունի Արամ քահանա Ասատրյանը ՀՀ իշխանությունների հետ․ ռուսական մամուլի անդրադարձը
Հայ առաքելական եկեղեցու Արագածոտնի թեմի վեց ներկայացուցիչ ձերբակալվել է։
Իշխանությունները դեռևս չեն բացահայտել ձերբակալությունների պատճառը․ գրել է EADaily-ն։
Կայքը հիշեցրել է, որ նախկինում Արագածոտնի թեմի քահանա Արամ Ասատրյանը պարբերաբար Հայ առաքելական եկեղեցու սկզբունքները քննադատող գրառումներ է արել։ Երեխայի մկրտության ծեսը խախտելու համար կարգապահական տույժի ենթարկվելուց հետո նա պնդում էր, որ Արագածոտնի թեմի առաջնորդ եպիսկոպոս Մկրտիչ Պռոշյանը ճնշել է իրեն։
Արագածոտնի թեմը շեշտել է, որ Արամ Ասատրյանի բոլոր հայտարարությունները նպատակ ունեն աջակցելու երկրի իշխանությունների հակաեկեղեցական արշավին։
Սոցիալական ցանցերում ակտիվորեն քննարկվում է Ասատրյանի կապերը գործող իշխանությունների հետ, և որոշները ենթադրում են, որ նրանք նրան օգտագործում են հոգևորականության շրջանում անհամաձայնություն սերմանելու համար։ Նա ինքն էլ խոստովանել է, որ օծման արարողություն է արել վարչապետի նստավայրում՝ Փաշինյանի կնոջ՝ Աննա Հակոբյանի հրավերով։
Հայաստանի իշխանությունների և Հայ առաքելական եկեղեցու միջև լարվածությունը սրվել է այն բանից հետո, երբ վարչապետ Փաշինյանը սոցիալական ցանցերում վիրավորեց բարձրաստիճան հոգևորականներին։ Ավելի ուշ կառավարության ղեկավարն առաջարկել է փոխել Ամենայն հայոց կաթողիկոսի ընտրության կարգն՝ առաջարկելով պետությանը կարևոր դերակատարում այս գործընթացում։ Սեպտեմբերի 10-ին վարչապետը խորհրդարանում հայտարարել է, որ Գարեգին Բ-ի հեռանալու հարցում փոխզիջում չի լինի։ Նա կրկնել է, որ անձամբ կհսկի գործընթացը և կներգրավի հավատացյալներին դրանում։
RT-ն, անդրադառնալով թեմային, գրել է․ «Հայաստանում սկսվել է քահանաների նկատմամբ խուզարկություն. վեցը ձերբակալվել են, և խուզարկությունները շարունակվում են»։ Հղում անելով տեղական լրատվամիջոցներին՝ RT-ն ընդգծել է, որ ձերբակալվածների թվում են Հայ առաքելական եկեղեցու Արագածոտնի թեմի քահանաները, ինչպես նաև Սաղմոսավանքի վանահայր Տեր Փառեն Առաքելյանը և թեմի առաջնորդ եպիսկոպոս Մկրտիչ Պռոշյանը։
Պռոշյանի տունը խուզարկվել է. նա Ամենայն հայոց կաթողիկոս Գարեգին II-ի եղբորորդին է։ Բոլոր քահանաները ներկայում պահվում են Երևանի քննչական կոմիտեում։
Նրանք, հնարավոր է, ձերբակալվել են Արագածոտնի թեմի քահանա Արամ Ասատրյանի հայտարարությունների պատճառով։ Նա նախկինում հայտարարել էր, որ հոգևորականներին, իբր, ստիպել են մասնակցել ընդդիմության բողոքի ցույցերին 2021 թվականին։
Քննչական կոմիտեն հայտնել է, որ ձերբակալությունները կապված են «պաշտոնական լիազորություններն օգտագործելով՝ հավաքին մասնակցելու հարկադրանքի» դեպքի հետ։
Հայկական մամուլին հղումով՝ թեմային անդրադարձել է նաև Kommersant-ը։
