Սևանավանքի գմբեթը բաց է անձրևի առաջ․ վերականգնման նախագիծը դեռ չի հաստատվել
Սևանավանքի Սուրբ Կարապետ եկեղեցու գմբեթի վերակագնման նախագծային աշխատանքները շարունակվում են․ ABC Media-ի հետ զրույցում ասաց Սևանավանքի ավագ քահանա Տեր Մինաս Մարտիրոսյանը։
«Նախագիծը պետք է հաստատի ԿԳՄՍՆ և Մայր Աթոռը, որպեսզի կարողանանք վերականգնման աշխատանքներ կատարել։ Սպասում ենք արձագանքի»,- ասաց Տեր Մինասը։
Ավագ քահանայի խոսքով՝ պետք է հոկտեմբերին աշխատանքները ավարտին հասցվեն, քանի որ եղանակը ցրտում է, անձրևները՝ շատանալու։
«Ցելաֆոններով ծածկել էինք գմբեթը, բայց քամին քշել էր։ Քանի որ շատ բարձր է, ամեն պահ չենք կարող կազմակերպել, բարձրանալ Սուրբ Կարապետի գմբեթ։ Ցավոք, հիմա անձրև գալու դեպքում խոնավությունը ներծծվում է գմբեթից»,- ասաց Սևանավանքի քահանան։
ABC Media-ն փորձեց ԿԳՄՍ նախարարությունից պարզել՝ երբ են պատրաստվում հաստատել նախագիծը՝ վերանորոգումն սկսելու համար, ասացին՝ մասնագիտական գնահատական է պետք տալ, խոստացան գրավոր հարցմանը 5–օրյա ժամկետում պատասխանել։
Հիշեցնենք՝ օգոստոսի 30-ին կայծակի հարվածից Սևանավանքի Սուրբ Կարապետ եկեղեցու խաչն ընկել էր, իսկ գմբեթից քարեր թափվել։ Ականատեսներից մեկը պատմել էր՝ ուժեղ անձրևի և որոտի ժամանակ եկեղեցու տանիքից կրակ է արձակվել, անջատվել են լույսերը, իսկ հետո խաչը հայտնվել է գետնին։ Սևանավանքի ավագ քահանա Տեր Մինասի խոսքով՝ վնասվել է 9-րդ դարի խաչը, իսկ տեղի ունեցածը կարող է նաև հոգևոր զգուշացում լինել։
Ի՞նչ վիճակում է խաչը, ինչպե՞ս է վերականգնվելու գմբեթը և ի՞նչ է ասում ԿԳՄՍ նախարարությունը։ Ռեպորտաժը՝ այստեղ։
