Պարզապես հեռացեք, ձեզ հետ պատերազմի գնալը ցեղասպանություն է. Աբրահամ Գասպարյան
Տարածք հանձնենք, թե ոչ, մեկ է, Ադրբեջանը հարձակվելու է. ավելի լավ է`հանձնենք ու պատերազմ լինի, քան չհանձնենք ու պատերազմ լինի: Եթե հարցը 50/50 եք դնում, մի՛ հանձնվեք, հեռացե՛ք։ Գուցե իսկապե՞ս Ադրբեջանը հարձակվի, ու մենք դիմադրենք. Փաշինյանի՝ անգամ Տավուշի գյուղերը հանձնելուց հետո երաշխիքների բացակայության մասին հայտարարությանն ի պատասխան ասել է «Genesis Armenia» ուղեղային կենտրոն/հիմնադրամի հիմնադիր Աբրահամ Գասպարյանը՝ «Փոխի՛ր Ալիքը Աբրահամ Գասպարյանի հետ» հեղիանակային հաղորդման շրջանակներում։
«Դիմադրենք առանց քեզ ու քո ոհմակի, որովհետև ձեզ հետ պատերազմ գնալն իրապես ցեղասպանություն է: Պարզ հաշվարկ. եկեք հասկանանք միասին, եթե Ադրբեջանի նախագահը հայտարարում է, որ չի ճանաչում 1991 թ. քարտեզները, եթե այդպես է, ուրեմն ինչո՞ւ է պահանջում Տավուշի 4 գյուղերը։ Իսկ եթե ճանաչում է, ապա ինչու՞ 1991 թվականի քարտեզներով Ադրբեջանը ներխուժել է Սյունիքի մարզի տարածք և բարձունքներ գրավել։ Այսինքն՝ Ադրբեջանը մտնում, գրավում է ինչ ուզում է՝ առանց սպասելու միջազգային թույլտվության կամ հարցնելու աշխարհի»,- ասել է Գասպարյանը։
Նա հիշեցրել է Տավուշի այդ հատվածներում հայկական պաշտպանական հզոր դիրքերն ու նշել, որ Բաքուն էլ շատ լավ գիտի այդ դիրքերը հաղթահարելու դժվարության, պաշտպանական գիծը չեզոքացնելու կորստաբեր լինելու մասին, դրա համար էլ նախընտրում է խաղաղ հանձնումը։
«Դու չես կարողանալու ո՛չ Եվրոպայից, ո՛չ Ռուսաստանից երաշխիք բերել, որ, դիցուք, Տավուշի գյուղերը հանձնելուց հետո ադրբեջանական բանակը դուրս կգա Սյունիքի գրավյալ դիրքերից»:
Գասպարյանը խոսել է նաև Փաշինյանի՝ պատմական ու իրական Հայաստանի միջև առաջացրած արհեստական հակասության մասին։
«Պատմական Հայաստանի ժամանակ Ադրբեջան գոյություն չուներ, ոչ էլ Թուրքիա. սա, կարծում եմ, 5 տարեկան երեխան էլ գիտի, բայց դու մի՛ փորձիր մեզ 4 տարեկանի տեղ դնել: Այդ քո ասած պատմական Հայաստանի փոխարեն, Ադրբեջանն է իր հորինած պատմական քարտեզն իրականություն է դարձնում, և հենց քո՛ չարաբաստիկ կառավարման տարիներին՝ կամաց-կամաց, սողացող պատերազմով ու վախի մթնոլորտում»,- ասել է Աբրահամ Գասպարյանը։
