Գողթանիկում անձրևներից ահռելի վնասներ են գրանցվել, հարյուրավոր անասուններ են սատկել
Առատ տեղումներն այս տարի Հայաստանի համար պատուհաս են դարձել։ Հերթական հարվածը Վայոց Ձորի մարզի Գողթանիկ գյուղին է բաժին հասել, օրեր առաջ տեղացած առատ անձրևներից ոչ միայն գյուղի ճանապարհն է քանդվել, այլև ջուրը գյուղացիներից շատերի անասուններին է քշել-տարել: ABCmedia-ն զրուցել է գյուղի բնակիչների հետ՝ պարզելու, որքան վնաս են կրել նրանք։
«Հուլիսի 28-ից 29 առավոտից սկսեցին անձրևները։ Մինչև ինձ զանգել են, ես գնացել եմ ֆերմա արդեն ուշ էր։ 66 անասուն արդեն սատկել էին, 27-ն էլ ոնց որ կորել են»,-պատմել է Գողթանիկի բնակիչ Նարեկ Պողոսյանը։
Ամեն անասնապահ միջինում քանի տասնյակ անասուն է կորցրել, ասում են գյուղացիները։ Նարեկ Պողոսյանի հաշվարկով՝ իր վնասը մոտ 2 մլն դրամ է կազմում:
Նույն գյուղի բնակիչ Արմեն Հարությունյանն էլ շուրջ 4,5 մլն դրամի վնաս ունի։ Նրան պատկանող 6 տասնյակից ավելի անասուն է սատկել, մոտավորապես 30-ն էլ՝ կորել։
«Համայնքապետարանից և ՆԳՆ փրկարար ծառայությունից եկել են, այդ պահին արագ-արագ հաշվել ենք, բայց հետո տեսել եմ, որ ավելի մեծ են կորուստներս։ Ասել են՝ եկող շաբաթ կստանանք փոխհատուցումը, սպասում ենք»,-ասել է Արմեն Հարությունյանը։
Գյուղի փլված ճանապարհի վերանորոգումը մի քանի օր է տևել, դեռ աշխատանքը չավարտած՝ նոր տեղումներից դարձյալ քանդվել է, այժմ անցանելի է միայն կենդանիների և բարձր մեքենաների համար։
