ՀՀ իշխանությունները սխալ ուղու վրա են Եկեղեցու հետ իրենց հարաբերություններում․ Թեհրանի թեմի առաջնորդի հարցազրույցը ABC Media-ին
Հայաստանի իշխանությունները սխալ ուղու վրա են Եկեղեցու հետ իրենց հարաբերություններում․ ABC Media-ի հարցին ի պատասխան ասել է Հայ առաքելական եկեղեցու Թեհրանի թեմի առաջնորդ Սեպուհ արքեպիսկոպոս Սարգսյանը։
Նա Ամենայն հայոց կաթողիկոսին հեռացնելու ՀՀ ղեկավարության ցանկությունը համարում է վտանգավոր և կործանարար միտում։
«Հայ առաքելական եկեղեցին ունի 1700 տարվա պատմություն, և նման քաղաքականություն չի կարող վարվել նրա նկատմամբ։ Եկեղեցին անկախ կազմակերպություն է»,-ասել է նա։
«Մենք ակնկալում ենք, որ Հայաստանի իշխանությունները երկխոսություն կսկսեն Եկեղեցու հետ։ Նրանց վարքագիծը բացասաբար է անդրադառնում սփյուռքի վրա։ Մինչ օրս մենք բարի կամքի որևէ դրսևորում չենք տեսել Հայաստանի ղեկավարության կողմից», – նշել է արքեպիսկոպոսը։
Սեպուհ սրբազանը նաև քննադատել է ՀՀ կառավարության քաղաքականությունն Արցախյան հարցում։
«Լեռնային Ղարաբաղը Հայաստանի անբաժանելի մասն է։ Նիկոլ Փաշինյանը սխալվում է, երբ ասում է, որ Արցախը հայկական հող չէ»,- հավելել է նա։
