Եթե մասնակցությունը բարձր լինի, ընդդիմությունը հաղթանակ կտոնի. Խաչիկ Մանուկյան
Վաղարշապատի համայնքապետի ընտրություններում «Հայրենիք» կուսակցության թեկնածու Խաչիկ Մանուկյանը լրագրողների հետ զրույցում նշել է, որ ընդդիմության հաղթանակի նշույլներ սկսել է տեսնել ընտրապայքարի ընթացքում, երբ հասկացել է, որ մարդիկ կարողացել են թմբիրից ձերբազատվել, հասկացել են, որ ազգ ու երկիր է վերանում։ «Այս իմաստով հաղթանակը կա, եթե վավերացվի քվեների տեսքով, ուրեմն այո, այդ հաղթանակը կլինի նաև այդպես: Կարծում եմ՝ եթե մասնակցությունը բարձր լինի, այո, ընդդիմությունը հաղթանակ կտոնի»,-ասել է նա:
Խաչիկ Մանուկյանը ընդդիմադիր մյուս ուժերի հետ կոալիցիա կազմելու հնարավորություն տեսնում է, շեշտելով, որ եթե չմիավորվեն, կփոշիացնեն իրենց ստացած քվեները: Նա վստահ է, որ միավորման դեպքում կկարողանան լուրջ խնդիրներ լուծել: Մանուկյանն ընտրվելուց հետո իր առջև դրված առաջին խնդիրը համարում է բարոյահոգեբանական մթնոլորտն առողջացնելը:
Նա նշել է, որ ընդդիմադիր ուժերի միջև կոնսուլտացիաներ արդեն եղել են տեխնիկական հարցերի շուրջ, բայց ընտրություններից հետո ևս լինելու են:
