Եվրամիությունը սկսել է իր «երկխոսությունը» Հայաստանի հետ՝ երկրի քաղաքացիներին ԵՄ առանց վիզայի ճանապարհորդության հնարավորություն տալու շուրջ, գրել է Eurasianet-ը: Այս հայտարարությունը հնչել է այն լուրերի ֆոնին, որ ներկայումս հայերի համար շատանում են դժվարությունները վիզա ստանալու և Շենգենյան գոտու երկրներ մուտք գործելու հարցում: Ակնկալվում է, որ բանակցությունների ավարտի համար տարիներ կպահանջվի, և Հայաստանը ստիպված կլինի իրականացնել հեռուն գնացող, ազատականացնող բարեփոխումներ՝ ԵՄ չափանիշներին համապատասխան: Ի վերջո, վիզայի ազատականացման ցանկացած գործարք կպահանջի ԵՄ խորհրդի և Եվրախորհրդարանի հավանությունը: Վերջին տարիներին՝ 2022 թվականից սկսած Ուկրաինայի պատերազմից հետո, ԵՄ հյուպատոսական բաժինները ծանրաբեռնված են եղել հայերի կողմից ներկայացված վիզայի դիմումների մեծ քանակով, ինչի հետևանքով ձգձգվել է
ճամփորդական փաստաթղթերի տրամադրում:
Նույնիսկ Շենգենյան վիզա ստանալուց հետո որոշ հայեր հայտնել են, որ ժամանելուն պես դժվարությունների են բախվել այն երկրում, որի համար ստացել են վիզա: Հայերին ընդունելու կոշտությամբ առավել առանձնացել է Բուլղարիան, որը վերջերս է միացել Շենգենյան գոտուն: Հաղորդումները ցույց են տալիս, որ Բուլղարիայի սահմանային իշխանությունները զգալի թվով հայ ճանապարհորդների ենթարկել են երկարատև և ինվազիվ հարցաքննության, ինչը բողոքներ է առաջացրել, որ վիզայի կանոնները կամայականորեն են կիրառվում:
ԵՄ պաշտոնյաները նշել են, որ Հայաստանի որոշ քաղաքացիներ չարաշահում են վիզային ռեժիմը՝ չարտոնված կերպով փոխելով իրենց ճամփորդական պլանները՝ ապակողմնորոշիչ պատրվակով փաստացի վիզաներ ստանալով: Խնդիրի մի մասը բխում է այն փաստից, որ որոշ հայեր ստանալով միանվագ մուտքի վիզա մեկ երկրի համար, անցնում են սահմանները դեպի այլ Շենգենյան երկրներ: Այս հարցը կարող է բարդացնել վիզայի ազատականացման երկխոսությունը՝ ԵՄ անդամ շատ երկրներում ներգաղթի և սահմանների անվտանգության վերաբերյալ մտահոգությունների ֆոնին:
Մինչդեռ, Արցախի էթնիկ հայերը ևս մեծ խոչընդոտի են բախվում ԵՄ երկրների համար վիզաներ ստանալիս, քանի որ նրանց անձնագրերը, որոնք կրում են «070» ծածկագիրը, հաճախ մերժվում են հյուպատոսական իշխանությունների կողմից: Այս անձնագրերը դասակարգվում են որպես ճամփորդական փաստաթղթեր, այլ ոչ թե՝ Հայաստանի քաղաքացիության վկայականներ և համարվում են անբավարար ԵՄ վիզա ստանալու համար:
