Հայ քանդակագործ Նաիրի Բաղրամյանի աշխատանքները կներկայացվեն Նյու Յորքի թանգարաններում

Հայ քանդակագործ Նաիրի Բաղրամյանի աշխատանքները կներկայացվեն
Նյու Յորքի «Մետրոպոլիտեն» և Ժամանակակից արվեստի թանգարաններում․ գրում է The NewYork Times-ը։

Ծագումով Իրանից 52-ամյա Բաղրամյանը հայտնի քանդակագործ է, ում աշխատանքները արդեն
ցուցադրվել են Վենետիկի երկու բիենալեներում (2011 եւ 2019 թվականներին) եւ
Documenta-ում (2017): Միացյալ Նահանգներում նա հիմա իր ճանաչման գագաթնակետին է։

Նրա քանդակները աբստրակտ են և ստեղծված 
նյութերից, որոնք կապված են արդյունաբերության ու դիզայնի հետ (օրինակ՝
ալյումին, սիլիկոն, կաշի կամ ապակի): Դրանք զբաղեցնում են պատկերասրահի տարածքը՝
ձգվելով հատակին ու պատերին, կախվելով առաստաղից և ամբողջացնելով տանիքը։

Դրանց տարօրինակ, հաճախ հումորային կառուցվածքները՝ ցցվածից մինչև ուռուցիկ,
հիացմունք են առաջացրել ինչպես մոդեռնիստական ​​ավանդույթի կողմնակիցների, այնպես
էլ դրա հակառակորդների կողմից: Բաղրամյանի համար դրանք քաղաքական են, իշխանության
համակարգերի ուսումնասիրության մեթոդ։ «Քաղաքական գաղափարների ձևավորումն է ինձ
սովորեցրել քանդակներ պատրաստել»,-ասել է նա: