Աննա Հակոբյանը ծանր է տանում, որ իր դեմ հայցադիմում ենք ներկայացրել․ Դանիել Իոաննիսյան
Ամբողջությամբ նորմալ եմ վերաբերվում՝ տիկին Հակոբյանը ծանր է տանում, որ իր դեմ հայցադիմում ենք ներկայացրել․ ABC Media-ի հետ զրույցում այսպես է մեկնաբանել Նիկոլ Փաշինյանի կնոջ՝ Աննա Հակոբյանի այսօրվա հայտարարություններն «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը։
«Ամբողջությամբ նորմալ եմ վերաբերվում, որ իրավական դաշտում մտադիր է մեր դեմ պայքարել, դա իր սահմանադրական իրավունքն է։ Ոչ մի կեղծ տեղեկություն չկա, ոչ մի սահմանադրական ու կոնվենցիոն իրավունք չի խախտվել։ Ինձ թվում է, ամենայն հարգանքով տիկին Հակոբյանի նկատմամբ, բայց ինքը կարիք ունի հասկանալու, թե, օրինակ, խոշտանգված չլինելու իրավունքը, նույնիսկ տեսականորեն, ով կարող է խախտել, իսկ ով, նույնիսկ տեսականորեն, չի կարող խախտել»,-ասել է Իոաննիսյանը։
Հիշեցնենք, որ Աննա Հակոբյանն այսօր հայտարարել է, թե Իոաննիսյանը խախտել է իր սահմանադրական իրավունքը, ինչի համար որոշել է դատի տալ Իոաննիսյանին ու «Անկախ դիտորդ» դաշինքին։
