Զելենսկիի այցն ու սադրիչ հայտարարությունները մեզ նոր արկածախնդրության մեջ են ներքաշելու․ Քոչարյան
«Հայաստան» դաշինքը քարոզարշավը մեկնարկում է Էջմիածնից։ Դաշինքի վարչապետի թեկնածու, ՀՀ երկրորդ նախագահ Ռոբերտ Քոչարյանի գնահատականով՝ Վոլոդիմիր Զելենսկիի՝ ՌԴ-ի վերաբերյալ Երևանից արած հայտարարությունները Հայաստանին ներքաշելու են նոր արկածախնդրության մեջ։
«Նիկոլ Փաշինյանն անում է ամեն ինչ Մակրոնին, եվրոպացիներին դուր գալու համար։ Եվ դա նրա համար, որ եվրոպական երկրները աչք փակեն Հայաստանում կատարվող ապօրինությունների վրա»,- նշում է Քոչարյանը
Իրենք, ներկայացնում է Երկրորդ նախագահը, նույնպես ձգտում են խաղաղության, բայց այն պետք է լինի հարատև ու երաշխավորված։
«Երբ ամեն ինչ կախված է մեկ մարդու քմահաճույքից, դա խաղաղություն չէ, ստորացում է։ Իսկ մենք ստորացում թույլ չենք տալու։ Իշխող ուժը սպառնում է պատերազմով, բայց կա պարզ ճշմարտություն․ պատերազմը սկսվում է այն ժամանակ, երբ հակառակորդը վստահ է՝ հաղթելու շանսերը մեծ է։ Վստահ ենք՝ ուժեղ բանակ ու վստահելի դաշնակիցներ ունենալով՝ որևէ մեկը չի կարող մեզ հետ խոսել սպառնալիքի լեզվով»,- ընդգծում է «Հայաստան» դաշինքի առաջնորդը։
