Մակրոնը կայցելի Սիրիա
Ֆրանսիայի նախագահ Էմանուել Մակրոնը կայցելի Սիրիա՝ երկկողմ հարաբերությունների ամրապնդման և փոխադարձ հետաքրքրություն ներկայացնող տարածաշրջանային ու միջազգային հարցերի քննարկման համար․ այս մասին հաղորդում է Սիրիայի պետական լրատվական գործակալությունը (SANA):
Նշվում է, որ Մակրոնին կուղեկցի ներդրողների և ֆրանսիական ընկերությունների ներկայացուցիչների պատվիրակություն, որը կանդրադառնա տնտեսական համագործակցության ընդլայնման ջանքերին՝ քաղաքական ներգրավվածության հետ մեկտեղ։
Հայտարարության համաձայն՝ արաբական հանրապետության նախագահ Ահմադ ալ-Շարաան և Մակրոնը նախատեսում են կլոր սեղանի հանդիպում անցկացնել պատվիրակությունների հետ։
Բանակցությունները կկենտրոնանան տարածաշրջանային և միջազգային զարգացումների, նաև տարբեր ոլորտներում համագործակցությունը խորացնելու հնարավորությունների վրա՝ որպես երկու երկրների միջև շարունակական քաղաքական երկխոսության մաս։
