Կարևոր է, որ ՀՀ կառավարությունը շարունակի հարմարավետ միջավայր ստեղծել ռուս ներդրողների համար․ Միշուստին

Մոսկվան ակնկալում է, որ ընտրություններից հետո ձևավորված Հայաստանի նոր կառավարությունը կապահովի Ռուսաստանի հետ հարաբերությունների զարգացումը բարեկամության և բարիդրացիության ոգով․ ինչպես գրում է ТАСС-ը, այդ մասին հայտարարել է Ռուսաստանի վարչապետ Միխայիլ Միշուստինն «Իննոպրոմ» ցուցահանդեսի շրջանակում Նիկոլ Փաշինյանի հետ հանդիպման ժամանակ։

Միշուստինը հավելել է, որ Եկատերինբուրգ կատարած այցը Փաշինյանի առաջին արտասահմանյան այցն էր Հայաստանում խորհրդարանական ընտրություններից հետո։

Ըստ նրա՝ կան լավ հնարավորություններ միջտարածաշրջանային ուղիղ կապերի ընդլայնման համար։

«Ես պատրաստ եմ Ձեզ հետ քննարկել երկկողմ հարաբերությունների ամբողջ շրջանակը», – հավելել է ՌԴ վարչապետը։

Միշուստինը նշել է Հայաստանի կողմից ռուս ներդրողների համար հարմարավետ միջավայր ստեղծելու շարունակական կարևորությունը։

«Կարևոր է, որ ՀՀ կառավարությունը շարունակի հարմարավետ միջավայր ստեղծել ռուս ներդրողների համար և ապահովի, որ նրանց իրավունքներն ու օրինական շահերը հարգվեն», – հանդիպման ժամանակ նշել է Միշուստինը։

Նրա խոսքով՝ Ռուսաստանը մնում է Հայաստանի արտաքին առևտրի գլխավոր գործընկերը՝ չնայած համաշխարհային տնտեսական անկայունությանը։

«Տեղական ընկերություններն ակտիվորեն աշխատում են Հայաստանի հանքարդյունաբերության, մեքենաշինության, տրանսպորտային ենթակառուցվածքների, էներգետիկայի ոլորտում, այդ թվում՝ ատոմային էներգիայի խաղաղ օգտագործման, և թվային տնտեսության ոլորտներում», – նշել է Միշուստինը։

Ռուսաստանը մեծ նշանակություն է տալիս նաև Հայաստանի հետ հումանիտար համագործակցությանը և առաջարկում է շարունակել փոխադարձ մշակութային օրերի և այլ համատեղ միջոցառումների անցկացման ավանդույթը։

Ռուսաստանի վարչապետն ընդգծել է, որ օրակարգում են նաև կրթական երիտասարդական միջոցառումները։