Խոշոր գողություն Սիցիլիայի թանգարանում․ անհետացել են Անտոնելլո դա Մեսինայի գործերը

Սիցիլիայի Մեսինա քաղաքի Տարածաշրջանային թանգարանից (MuMe) գողացել են Վերածննդի դարաշրջանի իտալացի նշանավոր նկարիչ Անտոնելլո դա Մեսինայի մի քանի ստեղծագործություն։ Այս մասին հայտնել է թանգարանի տնօրեն Մարիզա Մերկուրիոն։

Նրա խոսքով՝ գողությունը տեղի է ունեցել շաբաթ օրը՝ ուշ երեկոյան։ Հանցագործները ներխուժել են ցուցասրահներ՝ շրջանցելով ահազանգման և անվտանգության համակարգերը, և թանգարանից դուրս են բերել Սուրբ Գրիգորիի հայտնի պոլիպտիխի հինգ փայտե վահանակներից երեքը։

Բացի այդ, գողացել են փոքր չափերի երկկողմանի մի նկար, որի մի կողմում պատկերված է Մադոննան, իսկ մյուսում՝ Քրիստոսը՝ փշե պսակով։ Նշված աշխատանքը հանվել է պաշտպանիչ զրահապատ ցուցափեղկից։

«Մենք ցնցված ենք։ Սա մեծ կորուստ է թանգարանի, քաղաքի, համայնքի և արվեստի աշխարհի համար»,- Մերկուրիոյի խոսքերը մեջբերում է Corriere della Sera-ն։

Թանգարանի տնօրենը նշել է, որ գողացված ստեղծագործությունները դա Մեսինայի երկու ամենակարևոր և հայտնի աշխատանքների շարքին են դասվում։ Նա հույս է հայտնել, որ իրավապահներին կհաջողվի բացահայտել և ձերբակալել գողության հեղինակներին։