«Շահագործել» ու «կախարդել» երիտասարդներին․ Meta-ի դեմ հայց ներկայացրած անձինք պահանջում են ավելի քան 1 տրիլիոն դոլարի փոխհատուցում

Meta-ն կրկին կանգնել է դատարանի առաջ։ Դա կարող է վտանգել ընկերության գործունեությունը, քանի որ այն արդեն պարտվել է մի քանի գործով, որոնցում Meta-ի հարթակները համարվել են վնասակար անչափահասների համար․ գրում է BBC-ի ռուսական ծառայությունը։

Դատավարությունը բխում է 2023 թվականին ԱՄՆ 30 նահանգի, այդ թվում՝ Կալիֆոռնիայի և Նյու Յորքի ներկայացրած դատական հայցից, որով ընկերությունը մեղադրվում է երեխաների գաղտնիության մասին օրենքների բազմաթիվ խախտումների համար։

Ընկերության շուկայական կապիտալիզացիան ներկայում գնահատվում է մոտավորապես 1.5 տրիլիոն դոլար: Հայցվորները պահանջում են ոչ միայն ավելի քան 1 տրիլիոն դոլարի փոխհատուցում, այլև փոփոխություններ Instagram-ում և Facebook-ում, այդ թվում՝ լայքերի հաշվիչների և անվերջ հոսքի վերացում։

Եթե Meta-ն, ի վերջո, պարտվի այս մասշտաբի գործով, դա կարող է հանգեցնել երիտասարդների կողմից սոցիալական ցանցերի օգտագործման սկզբունքի հիմնարար փոփոխությունների։

Հայցվորները պահանջում են մոտեցման հիմնարար փոփոխություն, մասնավորապես՝

• ներդնել ծնողական ստուգման գործընթաց դեռահաս օգտատերերի համար,

• փոփոխել «դոֆամինի վրա հիմնված առաջարկությունների ալգորիթմները»,

• հեռացնել արտաքին տեսքը փոխող ֆիլտրերը,

• անջատել ավտոմատ միացվող տեսանյութերը,

• արգելել բազմակի հաշիվների ստեղծումը,

• անջատել անհետացող «անցողիկ» գրառումները, մասնավորապես՝ Instagram Stories-ը։

Հայցվորները կարծում են, որ այս գործառույթները նախատեսված են օգտատերերին, այդ թվում՝ դեռահասներին, խրախուսելու համար հնարավորինս հաճախ այցելել հարթակներ և այնտեղ մնալ որքան հնարավոր է երկար։ Հաճախակի ծանուցումները, որոնք խրախուսում են օգտատերերին մուտք գործել հավելվածներ, նաև խոչընդոտում են օգտատերերին ավելի քիչ ժամանակ անցկացնել առցանց։

Հայցվորները պնդում են, որ Meta-ն «ընտրել է շահագործել երիտասարդներին և կախարդել նրանց» մարտավարությունը՝ իր օգտատերերի բազան ընդլայնելու և իր բիզնեսը զարգացնելու համար։

Meta-ն հետևողականորեն հերքում է այս մեղադրանքները։