«Զեղչ եմ ուզում»․ Wildberries-ը հաճախորդներին հնարավորություն է տվել անհատական զեղչ խնդրել վաճառողից

Wildberries-ի օգտատերերը կկարողանան վաճառողներից զեղչ խնդրել իրենց դուր եկած ապրանքների համար։ Մարկետփլեյսը որոշ ապրանքային քարտերում ավելացրել է «Ցանկանում եմ զեղչ» կոճակը. РИА Новости-ի հաղորդմամբ՝ այդ մասին հայտնել է ընկերության մամուլի ծառայությունը։

Նոր գործառույթը կհայտնվի այն վաճառողների ապրանքային քարտերում, որոնք միացրել են գործիքը։

Գնորդները կկարողանան նշել ցանկալի զեղչը՝ 1%-ից մինչև 35%։ Զեղչ տրամադրելու և այն ապրանքների մասին, որոնց համար այս տարբերակը հասանելի է, որոշումը կայացնում է վաճառողը։

«Հարցումները կարող են մշակվել ձեռքով կամ ավտոմատ կերպով։ Առաջին դեպքում վաճառողը կորոշի՝ ընդունե՞լ, թե՞ մերժել գնորդի առաջարկը։ Երկրորդ դեպքում վաճառողը նախապես կսահմանի առավելագույն զեղչը, որը նա պատրաստ է տրամադրել որոշակի ապրանքի համար», – բացատրել է Wildberries-ը։

Հարցումը հաստատվելուց հետո գնորդը կստանա անհատականացված գովազդային կոդ, որը կգործի 24 ժամ։ Այն կարող է օգտագործվել ընտրված ապրանքի մեկ կամ մի քանի միավոր գնելիս։

Ընկերության տվյալներով՝ գործիքը սկզբում հասանելի կլինի Ռուսաստանի վաճառողներին։ Մեկ վաճառողը կկարողանա դրան միացնել մինչև 50․000 ապրանք։