Գնանք Բաքու և հանդիպենք գերիներին․ Աղվան Վարդանյանի առաջարկը՝ ԱԺ նախագահին
«Հայաստան» խմբակցության պատգամավոր Աղվան Վարդանյանն Ազգային ժողովում առաջարկել է պատգամավորական պատվիրակություն ձևավորել և մեկնել Բաքու՝ այնտեղ պահվող հայ գերիներին հանդիպելու, նրանց պահման պայմաններին և առողջական վիճակին ծանոթանալու, նաև նրանց դատավճիռներին ծանոթանալու նպատակով։
Վարդանյանի խոսքով՝ Արցախի Հանրապետության ռազմաքաղաքական ղեկավարությունը, նաև առնվազն 11 ՀՀ քաղաքացիներ արդեն երեք տարի գտնվում են Ադրբեջանում՝ բանտարկված վիճակում։
«Նրանց դատում են՝ միջազգային բոլոր նորմերի ոտնահարմամբ։ Իրականում այդ դատավարությունն ուղղված է Հայաստանի Հանրապետության դեմ»,- ասել է պատգամավորը։
Վարդանյանը քննադատել է իշխանության մոտեցումը՝ նշելով, որ երեք տարին բավարար է ցույց տալու համար, որ հայ գերիների ազատության հարցում արդյունավետ արդյունք չի արձանագրվել։
Վարդանյանը նաև նշել է, որ գերիները զրկված են անգամ իրենց դատավճիռներին ծանոթանալու հնարավորությունից, իսկ Ադրբեջանը փակել է Կարմիր խաչի գրասենյակը։ Պատգամավորը նաև խոսել է խոշտանգումների և բռնաճնշումների վերաբերյալ տեղեկությունների մասին։
«Նրանց ազատության մասին խոսում են Միացյալ Նահանգների Կոնգրեսում և այլ խորհրդարաններում։ Իսկ ի՞նչ ենք անում մենք՝ ժողովրդի ներկայացուցչական մարմնի անարժան անդամներս։ Ոչինչ»,- հայտարարել է նա։
Վարդանյանը Ազգային ժողովի նախագահ Ռուբեն Ռուբինյանին առաջարկել է ձևավորել միջխմբակցական պատվիրակություն՝ «Քաղաքացիական պայմանագիր» խմբակցությունից հինգ, «Ուժեղ Հայաստանից»՝ երեք, իսկ «Հայաստան» դաշինքից՝ երկու պատգամավորի մասնակցությամբ։ Պատվիրակությունը պետք է մեկնի Բաքու և հանդիպի այնտեղ պահվող բոլոր հայ գերիներին, ծանոթանա նրանց պահման պայմաններին ու առողջական վիճակին, ինչպես նաև ձեռք բերի նրանց դատավճիռները։
Պատգամավորն առաջարկել է նաև հանդիպումներ կազմակերպել Ադրբեջանի մարդու իրավունքների պաշտպանի և Ադրբեջանում հավատարմագրված ԱՄՆ-ի, Ֆրանսիայի ու Ռուսաստանի դեսպանների հետ։
Վարդանյանը նշել է, որ պատվիրակությունը կարող է ղեկավարել Ռուբինյանը՝ հաշվի առնելով Ադրբեջանի հետ աշխատանքի նրա փորձը։
«Մենք կատարենք մեր պարտքը, անենք այն, ինչ ճիշտ է ու պատասխանատու»,- եզրափակել է Աղվան Վարդանյանը։
