Ֆրանսիայից հետո Իտալիայում ևս դպրոցականների զանգվածային բողոքի ակցիաներ են սկսվել
Իտալիայի մի շարք քաղաքներում աշակերտների և ուսանողների զանգվածային բողոքի ակցիաներն ավարտվել են ոստիկանության հետ բախումներով։ Թուրինում իրավապահները ցուցարարների դեմ կիրառել են ջրցան մեքենաներ և արցունքաբեր գազ՝ այն բանից հետո, երբ վերջիններս ոստիկանների ուղղությամբ քարեր և շշեր են նետել։
Բողոքի ակցիաների հիմնական կենտրոններից մեկը Թուրինն է եղել, որտեղ փողոցներ են դուրս եկել հազարավոր երիտասարդներ։ Կաստելլո հրապարակում երթի մասնակիցներից ոմանք բախվել են ուժայինների հետ։ Ոստիկանությունը փորձել է կանգնեցնել ցուցարարների բազմությունը, ինչից հետո բախումներ են սկսվել։
Լարված իրավիճակ է ստեղծվել նաև Բոլոնիայում։ Այնտեղ բողոքի ակցիային մասնակցել է շուրջ հազար աշակերտ և ուսանող։ Երկաթուղային կայարանի հարակից տարածքում ցուցարարները ոստիկանության ուղղությամբ շշեր են նետել։ Ի պատասխան՝ իրավապահները վահանների օգնությամբ հետ են մղել ցուցարարներին։
Բողոքի ակցիաների մասնակիցները պահանջում են ավելացնել կրթության ոլորտի ֆինանսավորումը, բարելավել դպրոցների վիճակը և վերանայել պետական առաջնահերթությունները։
Ակցիաներ են անցկացվել նաև Հռոմում, Ջենովայում, Միլանում և Վենետիկում։ Որոշ քաղաքներում ուսանողներին են միացել նաև ուսուցիչները։
