Փաշինյանը չի գտնում կիրանցեցիների սեփականության վկայականների իրավական հիմքերը
Այս պահի դրությամբ մենք առաջին հերթին կենտրոնացած էինք տանիքների վրա, որտեղ շինություններ էին․ ասել է Փաշինյանը՝ պատասխանելով այն հարցին, որ Տավուշում որոշ քաղաքացիներ հրաժարվել են փոխհատուցումից, քանի որ ունեն Կադաստրի պետական վկայական:
Նրա խոսքով՝ գործնականում շինությունների հարցերը լուծված են, իսկ փոխհատուցումները՝ տրված:
«Ինչ վերաբերում է հողամասերին, մի մասի վերաբերյալ դիմումներ կան և աշխատանք տարվում է: Բայց ես ուզում եմ տեղեկացնել, որ սահմանազատման աշխատանքի ընթացքում մենք առերեսվել ենք և ինքներս մեզ հարց ենք տվել, որ եթե այնտեղ սեփականության վկայակններ կան, դա հարց է, որ մենք պիտի հասկանանք՝ ինչո՞ւ և ինչպե՞ս է տեղի ունեցել»,- ասաց Փաշինյանը:
Նրա խոսքով՝ իրենք փորձել են բարձրացնել սեփականության այդ վկայականների հիմքում դրված իրավական հիմքերը, իսկ այս պահին որպես արձանագրում ասում է, որ այդ հիմքերը չի գտնում պետական արխիվներում:
«Դա ինչ-որ առումով տրամաբանական է, քանի որ հողահատկացման եւ մյուս աշխատանքների համար հստակ պետք է լիներ իրավական հիմք: Եւ այդ տարածքները, որոնց մասին մենք խոսում ենք, այդ տարածքները 1976 թվականի դե յուրե իրավական ուժ ունեցող քարտեզներով ՀՀ տարածք չեն»,- ասաց Փաշինյանը:
Նա նաև նշել է, որ հաշվի առնելով իրադրության յուրահատկությունը, իրենք հանձն են առել այս խնդիրների լուծումը:
Դիտարկմանը, թե 9 կիրանցի հրաժարվում է փոխհատուցում վերցնել, ի՞նչ է լինելու, արդյոք նրանց մուտքը արգելվելու է իրենց սեփական հողատարածք, Փաշինյանն ասաց, որ պետական սահմանը պետական սահման է, եւ այն դե յուրե հիմնավորված է, իրենք ամեն ինչ անելու են քաղաքացիների իրավունքները մաքսիմալ պաշտպանվեն ու պահպանվեն:
