Ֆրանսիայի վարչապետը ժամանել է Ելիսեյան պալատ, որտեղ պետք է հրաժարական տա

Ֆրանսիայի վարչապետ Գարբրիել Աթալը գնացել է Ելիսեյան պալատ, որտեղ պետք է հրաժարականի դիմում ներկայացնի նախագահ Էմանուել Մակրոնին, հայտնում է BFM TV-ն։

Ֆրանսիայում կիրակի տեղի է ունեցել Ազգային ժողովի (Ֆրանսիայի խորհրդարանի ստորին պալատ) արտահերթ ընտրությունների երկրորդ փուլի քվեարկությունը։ Նախնական տվյալներով՝ ձախ կուսակցությունների կոալիցիան «Նոր ժողովրդական ճակատը» հաղթել է Ֆրանսիայի խորհրդարանական ընտրություններում՝ ԱԺ 577 մանդատներից 182-ը: Էմանուել Մակրոնի «Միասին» կոալիցիան զբաղեցրել է երկրորդ տեղը՝ Ազգային ժողովում ստանալով 168 մանդատ։

Մարին Լը Պենի Ազգային հանրահավաքը խորհրդարանական ընտրություններում զբաղեցրել է երրորդ տեղը՝ ստանալով 143 մանդատ երկրի խորհրդարանի ստորին պալատում։ Եթե պետության ղեկավարն ընդունի նրա հրաժարականը, Աթալը կշարունակի կատարել վարչապետի պարտականությունները՝ մինչև նոր վարչապետի նշանակումը։