Հայոց ցեղասպանության նման ողբերգություններից քաղված դասերն ընդգծում են մշակութային հիշողության պահպանման և հաշտեցման խթանման կարևորությունը․ ռուսական «Առաջին ալիք»
Աշխարհի հայերն այսօր հարգանքի տուրք են մատուցում իրենց հայրենակիցների՝ 111 տարի առաջ Օսմանյան կայսրությունում տեղի ունեցած ցեղասպանության զոհերի հիշատակին։ Հուշարձաններին ծաղիկներ են դրվում, երթեր և հիշատակի հանրահավաքներ են տեղի ունենում․ նշվում է ռուսական «Առաջին ալիքի» ռեպորտաժում։
Ռուսաստանում Հայ առաքելական եկեղեցու 80 եկեղեցիներում անցկացվում են պատարագներ։ Դրանք խորհրդանշում են վիշտը, հոգևոր միասնությունը և ժողովրդի պատմական հիշողությունը պահպանելու ցանկությունը։
Վլադիմիր Պուտինն ուղերձ է հղել հիշատակի միջոցառումների մասնակիցներին։ ՌԴ նախագահը նշել է, որ զանգվածային ոչնչացման քաղաքականությունը որևէ արդարացում չունի, և աշխարհը պետք է միավորի ուժերը՝ դրա կրկնությունը կանխելու համար։
Այսօր նաև տեղի է ունեցել Հայոց ցեղասպանությանը նվիրված համաժողով, որին տեսակապով մասնակցել է ֆրանսիացի գեներալ և Հինգերորդ հանրապետության առաջին նախագահ Շառլ դը Գոլի թոռը՝ Պիեռ դը Գոլը։
Նա նշել է. «Հայոց ցեղասպանության, Երկրորդ համաշխարհային պատերազմի ցեղասպանության և Մերձավոր Արևելքում բնակչության կոտորածների ու տեղահանությունների նման ողբերգություններից քաղված դասերն ընդգծում են մշակութային հիշողության պահպանման և հաշտեցման խթանման կարևորությունը: Հետևաբար, մենք աջակցում ենք փաստերը հաստատելու, պատմական ժառանգությունը պաշտպանելու և խաղաղությունը խթանելու նախաձեռնություններին: Եվ որքան ավելի ակտիվ լինենք, այնքան ավելի մեծ կլինեն երկխոսության հնարավորությունները»:
