Հրթիռակոծվող Հալեպ. ի՞նչ է սպառնում հայերին և ի՞նչ են խոստացել ապստամբները նրանց
Հալեպի հայկական համայնքում զոհեր, վիրավորներ չկան. ABCmedia-ի հետ զրույցում ասաց «Գանձասար» պաշտոնաթերթի խմբագիր Զարմիկ Պողիկյանը։
«Երեկվա համեմատ այսօր վիճակը հանդարտ է։ Կրակոցներ չեն լսվել դեռ։ Կան հայեր, որոնք որոշել են լքել Հալեպը՝ անվտանգ վայր տեղափոխվելով։ Կան հայեր էլ, որ գիշերը լքել են քաղաքը, այսօր նորից վերադարձել»,- ասաց Պողիկյանը։
Որոշ շուկաներ, խանութներ փակ են, սակայն վիճակը կրիտիկական չէ՝ հավելեց Պողիկյանը։
ABC media-ի աղբյուրները Հալեպից տեղեկացրել են, որ գիշերը հրթիռակոծության ձայները չեն դադարել, ապստամբները խոստացել են խնայել հայերին, քրիստոնյաներին և առհասարակ խաղաղ բնակչությանը, փոխարենը հաշվեհարդար են տեսնում զինվորականների նկատմամբ: Քաղաքում հացի հերթեր են: Ապստամբները հայտարարել են, որ քաղաքացիներն այսուհետ Հալեպում կարող են առևտուր անել ինչպես թուրքական լիրայով, այնպես էլ ԱՄՆ դոլարով:
