Հայաստանն ունի ամենաանվտանգ մայրաքաղաքը հարևան պետությունների շարքում․ Numbeo

Numbeo վարկանիշային հարթակը հրապարակել է «2025 թվականի կիսամյակային հանցագործության ինդեքսը»։

Երկրի կամ քաղաքի տեղը վարկանիշում որոշվում է երկու բաղադրիչով՝ հանցագործության և անվտանգության ինդեքսով։ Առաջինը գնահատում է քաղաքում կամ երկրում հանցագործության ընդհանուր մակարդակը։

Այն դասակարգվում է հետևյալ կերպ.

• Շատ ցածր՝ 20 և պակաս միավոր,
• Ցածր՝ 20.01-40 միավոր,
• Միջին՝ 40.01-60 միավոր,
• Բարձր՝ 60.01-80 միավոր,
• Շատ բարձր՝ 80-ից բարձր։

Անվտանգության ինդեքսը, ըստ էության, հանցագործության ինդեքսի հակադարձն է։ Բարձր անվտանգության ինդեքս ունեցող քաղաքը համարվում է շատ անվտանգ։

Հանցագործության ինդեքսը հաշվի է առնում հարցումների պատասխանները հետևյալի վերաբերյալ՝

• Հանցագործության մակարդակի ընդհանուր ընկալումը,
• Անվտանգության ընկալումը ցերեկային և գիշերային ժամերին,
• Կոնկրետ հանցագործությունների վերաբերյալ մտահոգությունները (կողոպուտ, մեքենայի գողություն, ֆիզիկական հարձակումներ, հանրային ոտնձգություններ և կողմնակալության վրա հիմնված միջադեպեր),
• Գույքի դեմ հանցագործությունների ծանրությունը (գողություն, վանդալիզմ),
• Բռնի հանցագործությունների ծանրությունը (հարձակում, սպանություն, սեռական հանցագործություններ)։

Երևանը տվյալ վարկանիշային աղյուսակում զբաղեցնում է 27-րդ տեղը 385 երկրների շարքում։ Հանցագործության ինդեքսը ՀՀ-ում  22․6 է, իսկ անվտանգությանը՝ 77․4: Հանցավորության մակարդակը համարվում է «ցածր»։

Ադրբեջանի մայրաքաղաք Բաքուն 79-րդ հորիզոնականում է՝ համապատասխանաբար 30․3 և 69․7 միավորներով։ Անկարան 153-րդն է՝ 39.3 և 60.7 միավորներով, Թեհրանը՝ 301-ը ( 57.1 և 42.9), Թբիլիսին՝ 48-ը (25.5 և 74.5)։

Կարևոր է նշել, որ Numbeo-ի հանցագործության ինդեքսը հիմնված է օգտատերերի տրամադրած ընկալումների վրա, որոնք կարող են տարբերվել պաշտոնական կառավարության վիճակագրությունից։ Ինդեքսը ծառայում է որպես համեմատական գործիք տարբեր քաղաքների կամ երկրների հարաբերական անվտանգությունը գնահատելու համար՝ օգնելով անհատներին կայացնել տեղեկացված որոշումներ և ավելի լավ հասկանալ որոշակի վայրերում հանցագործության մակարդակը։