ՀՀ-ն և Ադրբեջանը արդեն տեսնում են այդ խաղաղության պրակտիկ օգուտները․ Ալիևի ելույթը՝ ԵՔՀ գագաթնաժողովին
Ադրբեջանի նախագահ Իլհամ Ալիևը Երևանում անցկացվող Եվրոպական քաղաքական համայնքի 8-րդ գագաթնաժողովին միացել է տեսակապով ու տեղեկացրել, որ առաջարկել է 2028-ի հավաքն անցկացնել Բաքվում։
«Հայաստանն աջակցեց այդ նախաձեռնությանը»,- ասել է Ալիևն ու ընդգծել, որ արդեն 9 ամիս է՝ Հայաստանն ու Ադրբեջանը սովորում են ապրել խաղաղության մեջ։
«Մենք նախաստորագրեցինք Խաղաղության պայմանագրի տեքստը, և մեզ համար խաղաղությունն արդեն իրողություն է»,-ասել է Ալիևն ու հավելել, որ դրանից հետո Ադրբեջանի տարածքով հազարավոր տոննաներով բեռներ, այդ թվում՝ նավթամթերք է արտահանվել Հայաստան։
Ալիևի խոսքով՝ «Թրամփի ուղին» անցնելու է Հայաստանով դեպի Նախիջևան՝ դառնալով «Միջին միջանցքի» մաս։
«ՀՀ-ն և Ադրբեջանն արդեն տեսնում են այդ խաղաղության պրակտիկ օգուտները»,–ասել է Ալիևը։
Ադրբեջանի նախագահն անդրադարձել է նաև ԵԽԽՎ-ի վերջին բանաձևերին ու կառույցին մեղադրել երկակի ստանդարտներ կիրառելու համար։ Նրա խոսքով՝ Եվրոպական խորհրդարանը 5 տարում Ադրբեջանի դեմ 14 բանաձև է ընդունել, ինչը «սևեռում» է ցույց տալիս։
Վերջում Ալիևը շնորհավորել է Փաշինյանին՝ Եվրոպական քաղաքական համայնքի 8-րդ գագաթնաժողովը Երևանում անցկացնելու կապակցությամբ։
