Սուրեն Պետրոսյանին Էրեբունու՝ ձերբակալվածներին պահելու վայր բերել է Հայաստանի փոխոստիկանապետ Հակոբյան ազգանունով մեկը, որն անմիջապես հրահանգել է մեկուսացնել նրան. ABC media-ի հետ զրույցում ասել է պատգամավոր Թագուհի Թովմասյանը։
«Սուրենը ոչ մի օրինախախտ քայլ չի արել, բացի այդ՝ ոստիկանությունը որևէ հայտարարությամբ հանդես չի եկել, օրինական պահանջ չի ներկայացրել, որը, ասենք, չկատարելու համար ձերբակալեին։ Սա քաղաքական հրահանգ է եղել, որպեսզի Սուրեն Պետրոսյանին՝ որպես Տավուշի պայքարի առաջնորդներից մեկը, մեկուսացնեն հասարակությունից»,- ասել է Թովմասյանն ու հավելել՝ Սուրենը մարտական է տրամադրված և շարունակելու է իր գործը։
«Հող հանձնելը չի ներվելու և չի ընդունվելու»,- պատգամավորի միջոցով փոխանցել է Սուրեն Պետրոսյանը:
«Խնդրել է՝ բոլոր ոսկեպարցիներին փոխանցեմ, որ չտխրեն, չկոտրվեն։ Նա հույս ունի՝ ձերբակալված երկար չի մնա»,- ասել է պատգամավորը։
Հիշեցնենք՝ երեկ Նոյեմբերյան քաղաքում ոստիկանները ձերբակալել էին մեկ տասնյակից ավելի ցուցարարների ու ժամեր անց ազատ արձակել։ Շարունակում է ձերբակալված մնալ միայն Սուրեն Պետրոսյանը։
