Ոստիկանների ուղղությամբ շիշ նետողին մեկուսացնելու փոխարեն այլ մարդկանց դեմ են քրգործ հարուցում. Մենուա Սողոմոնյան
Ոստիկանության մեջ կան մարդիկ, որոնց պետք է պատասխանատվության ենթարկել, նրանք սադրիչներ են, չգիտեմ՝ ինչի դիմաց հատուկ սադրանքների են դիմում կամ ստեղծում են իրավիճակներ, որ սադրանքներ տեղի ունենան. ABC media-ի հետ զրույցում ասել է «Հայաքվե» նախաձեռնության անդամ, միջազգայնագետ Մենուա Սողոմոնյանը՝ անդրադառնալով ԱԳՆ մոտ տեղի ունեցած միջադեպին, որի հետևանքով 29 ցուցարար է ձերբակալվել:
«Եթե ամբոխի միջից՝ մարդկանց մեջտեղի մասից շիշ են շպրտում, և ոչ թե նրան են անմիջապես մեկուսացնում, այլ այն մարդկանց, որոնք նման բան չեն արել,տացվում է՝ ցանկացած պահի կարող են գալ, ասել զանգվածային անկարգություն ես անում: Սա ամենաթողություն է, սրանով պետք է զբաղվեն պատկան մարմիններ, պարզելու, թե ում ցուցումով ու վկայությամբ է այդ 29 մարդու նկատմամբ քրեական գործ հարուցվում»,-ասել է Մենուա Սողոմոնյանը:
Նա չի բացառել, որ 29-ից ինչ-որ մեկը կարող է ինչ֊որ բան արած լինի: «Բայց նրանց մեծ մասին ճանաչում եմ և վստահ եմ, որ այդ մարդիկ սադրանքի հետ կապ չունեն, այստեղ գործ ունենք զրպարտության, սուտ վկայության հետ»,-ասել է նա:
Մենուա Սողոմոնյանը նշել է, որ այն ոստիկանները, որոնք պնդում են, թե այս մարդիկ անկարգություն են իրականացրել, պետք է պատասխանատվության ենթարկվեն, եթե պարզվի, որ նման բան չի եղել:
