Մենք, ցավոք, ընդգծում ենք, որ այս հարցում ևս Երևանը տրվեց Արևմտյան երկրների ճնշումներին․ խոսելով ՀՀ տարածքում ռուսական «Միր» քարտերով գործարքների դադարեցման մասին՝ ասել է ՌԴ ԱԳՆ ներկայացուցիչ Մարիա Զախարովան։
«Բնականաբար տնտեսությունը դրանից կտուժի, քաղաքացիների համար կստեղծվեն որոշակի դժվարություններ, ՌԴ-ում աշխատող հայերի համար դժվար կլինի կատարել բանկային փոխանցումներ, քարտերով վճարելու հնարավորություն չեն ունենա նաև զբոսաշրջիկները։ Հիշեցնեմ, որ նրանց քանակը նախորդ տարի գերազանցում էր 1 մլն, կան նաև այլ օրինակներ, թե ինչպես դա կհարվածի Հայաստանի տնտեսությանը»- ասել է Զախարովան։
Հիշեցնենք, որ «Միր» քարտերը մարտի 30-ից դադարել են գործել Հայաստանի բանկերում։ 2024 թվականի փետրվարին «Միր»-ը կամ ռուսական ազգային վճարային համակարգը ԱՄՆ պատժամիջոցների թիրախում է հայտնվել, Վաշինգտոնը պնդում է, որ այդ համակարգի միջոցով «Ռուսաստանը շրջանցում է պատժամիջոցները և պահպանում կապերը միջազգային ֆինանսական համակարգի հետ»։