Փոքր բիզնեսը հարկերից ազատելը սխալ մոտեցում է․ Խաչատուր Սուքիասյանի ճեպազրույցը՝ կետերով
ԱԺ «Քաղաքացիական պայմանագիր» խմբակցության պատգամավոր Խաչատուր Սուքիասյանը պատասխանել է լրագրողների հարցերին։
Ճեպազրույցի առանցքային կետերը ներկայացնում ենք ստորև․
- ՌԴ-ի հետ հարաբերություններում 30 տարում միշտ եղել են խնդիրներ: Դա քաղաքական, դիվանագիտական գործընթաց է, որը արդեն որոշ ընթացք է ստացել, և ես կարծում եմ, համաշխարհային հարթակներում տիրող իրավիճակը կբերի նրան, որ ավելի ճիշտ որոշումներ կկայացվեն, որովհետև իրավիճակն ինքն էլ ունի թելադրող գործոններ։
- Ընդհանրապես հարաբերությունների սրման պատճառը հաճախ լինում է Հայաստանի Հանրապետության ինքնիշխանության ձգտումը, որովհետև երբ Հայաստանը փորձում է ավելի անկախ որոշումներ կայացնել, սկսվում են ճնշումներ տարբեր երկրների կողմից։
- Աշխարհում ընդունված կարգ կա, որ եթե դու երկարաժամկետ պայմանագրեր ես կնքում, ապա ստանում ես ավելի ցածր գին, իսկ սրված իրավիճակներում գները կարող են բարձրանալ, բայց միջինացված գինը միշտ գոյություն ունի։
- ԵԱՏՄ-ն լավ հարթակ է եղել, սակայն Հայաստանի տնտեսության մոդեռնիզացիայի և ժամանակակից տեխնոլոգիաների ներմուծման արդյունքում հնարավոր է, որ հայկական արտադրանքը լայնորեն ներկայացվի նաև եվրոպական շուկաներում։
- Եթե որևէ գործարար Հայաստանից արտահանում է չհամապատասխանող ապրանք, դա լուրջ վնաս է թե՛ երկրի իմիջին, թե՛ տվյալ ընկերությանը, և նման հարցերը պետք է լուծվեն իրավական գործիքներով։
- Մենք պետք է անպայման մտնենք այն շուկաներ, որտեղ գործում են խիստ ստանդարտներ և ինստիտուցիոնալ պահանջներ, որովհետև հենց այդպես է կառուցվում կայուն և որակյալ տնտեսություն։
- Փոքր բիզնեսը ամբողջությամբ հարկերից ազատելը սխալ մոտեցում է, որովհետև դա խաթարում է մրցակցությունը և անհավասար պայմաններ ստեղծում տնտեսվարողների միջև։ Երբ որևէ գործունեություն չի հարկվում, դա մեծ հավանականությամբ հանգեցնում է ստվերային տնտեսության ձևավորմանը։
- Տնտեսվարողի և պետական կառավարման մտածողությունները տարբեր են․ բիզնեսմենը գործում է իր ռիսկով, իսկ պետությունը պատասխանատու է բոլորի համար։
- Պետությունը պետք է կառավարվի այլ սկզբունքներով, քան մասնավոր բիզնեսը, և պետական գործիչը պետք է առաջնորդվի ոչ թե շահույթով, այլ համակարգային պատասխանատվությամբ։
- Տարածաշրջանային համագործակցությունը կարող է նպաստել ընդհանուր տնտեսական աճին, քանի որ լոգիստիկ ծախսերի նվազումը հնարավորություն է տալիս ավելի մրցունակ գներով աշխատել։
- Եթե լոգիստիկան թանկ է, ապա ապրանքը ավտոմատ թանկանում է, իսկ հարևան երկրների միջոցով փոխադրումները կարող են զգալիորեն նվազեցնել այդ ծախսերը։
- Տարիներ շարունակ խոսվել է տարբեր ենթակառուցվածքային նախագծերի մասին, բայց իրական արդյունք չի գրանցվել, ինչը ցույց է տալիս, որ միայն հայտարարություններով հնարավոր չէ խնդիրներ լուծել։
