Ինչո՞ւ Իսրայելը որոշեց ճանաչել Հայոց ցեղասպանությունը հենց հիմա․ ТАСС
Իսրայելի կոալիցիոն կաբինետը միաձայն աջակցել է արտգործնախարար Գիդեոն Սաարի առաջարկին՝ անցյալ դարի սկզբին Օսմանյան կայսրությունում հայերի զանգվածային սպանությունները որպես ցեղասպանություն ճանաչելու վերաբերյալ։ Հարկ է նշել, որ սա տեղի է ունեցել վերջին տարիներին հրեական պետության և Թուրքիայի միջև հարաբերությունների կտրուկ վատթարացման, ինչպես նաև Իսրայելում 2026 թվականի աշնանը կայանալիք խորհրդարանական ընտրությունների ֆոնին․ գրել է ТАСС-ը։
Իսրայելի ղեկավարությունը, կարծես, անցել է Անկարայի բացահայտ քաղաքական զսպմանը միջազգային ասպարեզում։ Ճանաչելով Ցեղասպանությունը՝ Իսրայելը փաստացի «հաշվեհարդար տեսավ» Թուրքիայի հետ, բայց այժմ վտանգում է կորցնել լավ ռազմավարական ընկերոջն՝ ի դեմս Ադրբեջանի։ Բաքվի և հրեական պետության միջև կապերը ավանդաբար ամուր են. Ադրբեջանը Իսրայելի հիմնական նավթ մատակարարողներից մեկն է, իսկ Իսրայելն, իր հերթին, ադրբեջանական բանակին մատակարարում է ժամանակակից զենք։ Այնուամենայնիվ, հայկական հարցը, որպես ամբողջություն, Բաքվի համար զգայուն թեմա է, մասամբ՝ Թուրքիայի հետ եղբայրական հարաբերությունների պատճառով, ուստի՝ Ադրբեջանի արտգործնախարարության արձագանքը կոշտ էր։
Միևնույն ժամանակ՝ անսպասելի արձագանք, կամ ավելի ճիշտ՝ դրա լիակատար բացակայություն, եկավ հենց Երևանից։ Հայաստանը զգալի սառնությամբ արձագանքեց Իսրայելի նախաձեռնությանը։ Փաշինյանը բացահայտ հայտարարեց, որ անհրաժեշտություն չի տեսնում արձագանքելու այս քայլին։ Երևանի տրամաբանությունը պարզ է. ՀՀ ղեկավարությունը նախկինում հստակեցրել է, որ 1915 թվականի Ցեղասպանության միջազգային ճանաչումն այլևս իր արտաքին քաղաքականության առաջնահերթություն չէ։ Այժմ Փաշինյանի թիմն իր բոլոր ջանքերը կենտրոնացրել է Թուրքիայի հետ հարաբերությունները կարգավորելու փորձերի վրա, և Երևանը պարզապես կարիք չունի որևէ լրացուցիչ աշխարհաքաղաքական ցնցման՝ նույնիսկ իր օգտին։ Թուրքիայի հետ հարաբերություններում առկա փակուղին, ըստ էության, Նեթանյահուին և Սաարին հնարավորություն է տալիս գործնականում առանց որևէ ռիսկի քաղաքական միավորներ վաստակել ներքին ընտրական ասպարեզում՝ առաջիկա խորհրդարանական ընտրությունների նախաշեմին։
Խորհրդանշական է, որ Իսրայելի կաբինետի կողմից բանաձևի միաձայն հաստատումը համընկավ Վաշինգտոնից հրեական պետության համար մտահոգիչ լուրերի հետ։ Ըստ լրատվամիջոցների հաղորդագրությունների՝ Սպիտակ տունը սկսել է քննարկել Թուրքիային F-35 կործանիչներ և առաջադեմ ռեակտիվ շարժիչներ վաճառելու հնարավորությունը։
Իսրայելական կաբինետի քվեարկության հիմնական թաքնված ազդակն, անկասկած, 2026 թվականի հոկտեմբերին նախատեսված առաջիկա խորհրդարանական ընտրություններն էին։ Բանաձևի հեղինակ Սաարը վերադարձավ Նեթանյահուի «Լիկուդ» կուսակցություն միայն 2025 թվականի օգոստոսին։ Սա հաջորդեց վարչապետի հետ գրեթե հինգ տարվա տարաձայնություններին։ Այսօր «Լիկուդի» առաջնորդը, Սաարի առաջարկին աջակցելով, էապես պրագմատիկ քայլ է անում. նա ամրապնդում է իր ընտրական դիրքերը իշխող կուսակցության ներսում՝ կուսակցության ընտրական ցուցակների ձևավորման բարդ և վիճելի քաղաքական գործընթացից անմիջապես առաջ։
Այնուամենայնիվ, որպեսզի կաբինետի որոշումը դառնա լիովին իրավաբանորեն պարտադիր, այն պետք է հաստատվի Քնեսեթի կողմից։
