Մենք զենք չենք արտադրի․ Renault-ի աշխատակիցները դեմ են արտահայտվել ղեկավարության որոշմանը
Renault ավտոմոբիլային ընկերության ձեռնարկությունների շատ աշխատակիցներ համաձայն չեն ավտոմասերի արտադրության գծերում զենք արտադրելու ղեկավարության որոշմանը, սակայն հրաժարվելու դեպքում նրանց սպառնում է աշխատանքից ազատում։ Այս մասին, ТАСС-ի փոխանցմամբ, LCI հեռուստաալիքի եթերում հայտարարել է Renault-ի CGT արհմիության պաշտոնական ներկայացուցիչ Ֆլորան Գրիմալդին։
«Մենք գոհ չենք դեպի պատերազմ տանող այս համընդհանուր ընթացքից։ Մենք նաև գոհ չենք այն փաստից, որ շատ աշխատողների կանգնեցնում են փաստի առաջ՝ ասելով. «Կա՛մ դուք զենք եք արտադրում, կա՛մ մենք փակում ենք գործարանը, և ձեզ գործազրկություն է սպասվում»։ Մենք ակնհայտորեն չենք ցանկանում կրկնել անցյալի փորձը. մենք չենք ցանկանում վերապրել 1910-1930 թվականները և, ամենակարևորը, դրանց հետևանքները», – հայտարարել է Գրիմալդին։
Նրա խոսքով՝ շատ աշխատակիցներ հայտարարել են, որ «պայմանագիր են կնքել մեքենաներ, այլ ոչ թե զենք արտադրելու համար»։ Այս առումով արհմիության ներկայացուցիչն ընդգծել է, որ Renault-ի նոր գործադիր տնօրեն Ֆրանսուա Պրովոյի պնդումները, թե բոլորն աջակցում են ընկերության նոր քաղաքականությանը, «սխալ են»։
Հարցին, թե արդյոք երկիրը ստիպված կլինի՞ արձագանքել արտաքին սպառնալիքին, թե՞ աջակցել ՆԱՏՕ-ի դաշնակցին հարձակման դեպքում, Գրիմալդին նշել է, որ ո՛չ աշխատողները, ո՛չ էլ Ֆրանսիայի մյուս բնակիչները չեն շահի երկրի՝ պատերազմին հնարավոր ներգրավումից: Նրա խոսքով՝ միայն խոշոր ընկերություններն ու նրանց բաժնետերերը կշահեն՝ օրինակ բերելով ֆրանսիական Total Energies էներգետիկ ընկերությանը, որի շահույթը 2026 թվականի առաջին կեսին աճել է 72%-ով՝ Իրանի դեմ ԱՄՆ-Իսրայել պատերազմի հետևանքով նավթի գների աճի պատճառով:
CGT-ի ներկայացուցիչը հավելել է, որ սա «ոչ թե զսպման, այլ ոչնչացման ուժերի» կուտակում է, ընդ որում՝ Renault-ն ներկայացրել է ամսական մինչև 600 անօդաչու թռչող սարք արտադրելու ծրագրեր, որոնք կարող են տեղափոխել մինչև 500 կգ պայթուցիկ նյութեր: Նա նշել է, որ ընկերությունն «արդեն հաշվարկել է, թե որքան շահույթ կբերի դա իրենց». «Նրանք միայն այս նախագծից 10 տարվա ընթացքում պետք է վաստակեն 1 միլիարդ եվրո, մինչդեռ կա «8 այլ նախագիծ»»:
2025 թվականին Ֆրանսիայի Զինված ուժերի նախարարությունը հայտարարել է խոշոր ավտոարտադրողի կողմից Ուկրաինայում մարտական անօդաչու թռչող սարքերի արտադրություն հիմնելու ծրագրերի մասին: Հետագայում լրատվամիջոցները հայտնել են, որ խոսքը Renault-ի մասին է: Չնայած ընկերությունը դեռևս պաշտոնապես չի հաստատել Ուկրաինայում անօդաչու թռչող սարքեր արտադրելու իր ծրագրերը, փետրվարին նրա մամուլի ծառայությունը հայտարարություն է տարածել՝ հայտարարելով Լը Մանի մոտ գտնվող իր գործարանում Chorus բազմաֆունկցիոնալ անօդաչու թռչող սարքեր արտադրելու մտադրության մասին։
Մարտի վերջին Renault-ն հաստատել է, որ աշխատում է ռազմական և քաղաքացիական կարիքների համար նախատեսված անօդաչու ամենագնաց հարթակի ստեղծման ուղղությամբ, իսկ հունիսի 16-ին պաշտոնապես հայտարարել է Thales Group-ի հետ Toutatis զինամթերքի արտադրության ոլորտում համագործակցության մասին։
