Մտահոգված ենք մնում Լաչինի
միջանցքի շարունակական փակ մնալու կապակցությամբ, հատկապես որ այն փակ է առևտրային,
հումանիտար և մասնավոր մեքենաների համար․ ճեպազրույցի ընթացքում հայտարարել է ԱՄՆ պետքարտուղարության
մամուլի խոսնակի գլխավոր տեղակալ Վեդանտ Պատելը։
«Այս տեսակի մարդասիրական երթևեկության դադարեցումը, մեր կարծիքով,
վատթարացնում է հումանիտար իրավիճակը և խաթարում է խաղաղության գործընթացում վստահության
ամրապնդմանն ուղղված ջանքերը: Մենք կոչ ենք անում Ադրբեջանի կառավարությանը վերականգնել
այս միջանցքով առևտրային, հումանիտար և մասնավոր մեքենաների ազատ տարանցումը։ Մենք
նաև տեղյակ ենք, որ չորեքշաբթի օրը ՄԱԿ-ի ԱԽ-ն հանդիպում է ունենալու Լեռնային Ղարաբաղի
հարցի քննարկման համար և ակնկալում ենք, որ այնտեղ ևս տեղի կունենան քննարկումներ»,-ասել
է Պատելը։
Հարցին՝ ՄԱԿ-ում ԱՄՆ ներկայացուցչությունն ի՞նչ դիրքորոշում ունի
այս հարցի առնչությամբ, Պատելը խուսափել է պատասխանել։
«Մենք հետևողականորեն նշել ենք այն փաստը, որ ուղիղ երկխոսությունը
էական նշանակություն ունի այս երկարամյա հակամարտությունը լուծելու հարցում, և կարծում
ենք, որ ցանկացած ներգրավվածություն, որն ի վերջո խաղաղություն և կայունություն կբերի
Հարավային Կովկասի ժողովուրդներին, լավ և դրական քայլ կլինի»,-ասել է նա։
