ԱՄՆ-ի ագրեսիայի դեպքում Վենեսուելան զինված դիմադրության կանցնի․ Մադուրո
Վենեսուելայի նախագահ Նիկոլաս Մադուրոն հավանություն է տվել իշխող կուսակցության առաջարկին՝ ամերիկյան ագրեսիայի դեպքում զինված պայքարի անցնելու վերաբերյալ․ գրում է РИА Новости-ն։
«Վենեսուելայի միացյալ սոցիալիստական կուսակցությունը պետք է անհապաղ իրականացնի դա՝ մշակելով յուրաքանչյուր փողոցի ու համայնքի համար գործառնական ծրագրեր, որպեսզի մեր ամբողջ ժողովուրդը՝ հանգիստ, զսպված, բայց հաստատակամությամբ և քաջությամբ լի, ամենաբարձր պատրաստվածության մակարդակի վրա լինի»,- ասել է նա կուսակցության համագումարում։
Մադուրոյի խոսքով՝ սա ենթադրում է ժողովրդի նախապատրաստում հնարավոր ազգային և մայրցամաքային զինված պայքարին։
Քաղաքական գործիչը կրկին կոչ է արել ամրապնդել պաշտպանական կարողությունները՝ «Վենեսուելան անառիկ դարձնելու համար», քանի որ «ամերիկյան կայսրությունն արդեն 12 շաբաթ է՝ շարունակում է իր սպառնալիքներն ու հոգեբանական պատերազմը»։
Ավելի վաղ հաղորդվել էր, որ ԱՄՆ ականակիր նավերն ու հածանավերը զորավարժություններ են անցկացնում Կարիբյան ծովում՝ Վենեսուելայի ափերի մոտ։
