ՌԴ ԱԽ-ն նշել է՝ որքան պետք է վճարեն «Հարավկովկասյան երկաթուղիների» կոնցեսիոն պայմանագրի պոտենցիալ գնորդները
Երևանի հայտարարությունները «Հարավկովկասյան երկաթուղիների» (ՀԿԵ) կոնցեսիոն կառավարման փոխանցման անհրաժեշտության մասին տարօրինակ են․ ինչպես հայտնում է ТАСС-ը, այդ մասին հայտարարել է Ռուսաստանի անվտանգության խորհրդի քարտուղարի տեղակալ Ալեքսեյ Շևցովը։
«Հայկական կողմի հայտարարությունները, թե ՀԿԵ-ի կողմից հայկական երկաթուղիների կոնցեսիոն կառավարումը, իբր, «որոշակի մրցակցային կորուստներ է ստեղծում» հանրապետության համար, և այդ կոնցեսիոն կառավարումը երրորդ երկրներին զիջելու առաջարկները, մեղմ ասած, տարօրինակ են»,- ասել է նա։
Շևցովը նշել է, թե «համաձայնագիրը կնքվել է հայկական կողմի համար ամենահարմար պայմաններով»։
«Նախնական գնահատականներով՝ կոնցեսիոն պայմանագրի պոտենցիալ գնորդները պետք է վճարեն առնվազն 250 միլիոն դոլար իրավունքների և փոխհատուցման համար, տարեկան մոտ 40 միլիոն դոլար ծախսեն շահագործման ծախսերի համար, մոտ 400 միլիոն դոլար ներդնեն վնասված Իջևանի հատվածի վերականգնման, մոտ 200 միլիոն դոլար՝ Վանաձոր-Ֆիոլետովո հատվածի և մոտ 40 միլիոն դոլար՝ Թուրքիայի և Նախիջևանի Ինքնավար Հանրապետության հետ սահմանի հատվածների վերականգնման համար»,- հավելել է նա։
Հայկական երկաթուղային ցանցում բեռնափոխադրումների ծավալները, ըստ նրա, հաստատված չեն, իսկ դրանց աճի ներուժն ակնհայտ չէ, մինչդեռ դրանք երաշխավորված են նվազել, եթե Հայաստանը դուրս գա ԵԱՏՄ-ից։
Այնուամենայնիվ, ինչպես նշել է Շևցովը, տեսությունը միշտ կարելի է փորձարկել գործնականում։ Հնարավոր է նաև, որ արդյունքները կգերազանցեն սպասումները, և ԵԱՏՄ-ից դուրս գալուց Հայաստանի սոցիալ-տնտեսական կորուստները կլինեն ավելի մեծ:
