«Միջին միջանցքի» զարգացումը և «Զանգեզուրի միջանցքի» բացումը կնպաստեն տարանցիկ բեռնափոխադրումների աճին. Թուրքիայի փոխնախագահ

Թուրքիան աջակցում է Հարավային Կովկասում խաղաղություն ապահովելու ջանքերին, Բաքուն ու Երևանը զգալի առաջընթաց են գրանցել այդ ուղղությամբ․ հայտարարել է Թուրքիայի փոխնախագահ Ջևդեթ Յըլմազը։

«Կարելի է ասել, որ շատ քիչ ժամանակ է մնացել երկու երկրների (Ադրբեջանի և Հայաստանի – Խմբ.) միջև խաղաղության պաշտոնականացմանը։ Դրանից հետո Հարավային Կովկասը, որը մեծ ռազմավարական նշանակություն ունի, կսկսի այլ դեր խաղալ ինչպես տարածաշրջանային, այնպես էլ գլոբալ մակարդակով»,- ասել է նա։

Յըլմազի խոսքով՝ «Միջին միջանցքի» զարգացումը և «Զանգեզուրի միջանցքի» բացումը կնպաստեն տարանցիկ բեռնափոխադրումների աճին։

«Ընդհանուր առմամբ՝ տարածաշրջանում հավասարակշռության հաստատումը կապահովի ինչպես անվտանգության, այնպես էլ բարեկեցության աճ»,- նշել է թուրք պաշտոնյան։