Եկեղեցու շուրջ վեճը պառակտում է Հայաստանն ընտրություններից առաջ․ AFP

Ամիսներ շարունակ Նիկոլ Փաշինյանը կոչ է արել հեռացնել Հայ առաքելական եկեղեցու առաջնորդ Գարեգին Բ կաթողիկոսին՝ իր ամենաակնառու քննադատներից մեկին՝ պնդելով, որ նա երեխա ունի իր կուսակրոնության երդմանը հակառակ. գրում է France 24-ը՝ հղում անելով AFP-ին։

Անցյալ տարի Հարավային Կովկասի երկրի անվտանգության ուժերը ձերբակալել են տասնյակից ավելի հոգևորականների, այդ թվում՝ ազդեցիկ արքեպիսկոպոս Բագրատ Գալստանյանին, ինչպես նաև միլիարդատեր ընդդիմադիր գործիչ Սամվել Կարապետյանին՝ մեղադրելով նրանցից ոմանց Փաշինյանին տապալելու դավադրության համար․ մեղադրանքներ, որոնք նրանք մերժում են։

Ձերբակալությունները ցնցել են Հայաստանը՝ Իրանին և Թուրքիային սահմանակից, 3 միլիոն բնակչություն ունեցող խորապես քրիստոնյա երկրին, և Փաշինյանին բախման մեջ են դրել երկրի ամենահարգված հաստատություններից մեկի հետ՝ հունիսին կայանալիք ընտրություններից առաջ։ Գործակալության հետ զրուցած հայ քրիստոնյաները նշել են, որ պետական մարմիններն անհարկի հայտարարություններ են անում, անհարկի միջամտում և անպարկեշտ դիտողություններ են անում Կաթողիկոսի հասցեին։

«Եկեղեցին բոլորին միավորող օղակն է։ Մեր նպատակները միշտ կառուցողական են. չարին չարով չպատասխանել, այլ սեր սերմանել և խաղաղություն քարոզել»,- նշել է Արմավիր քաղաքի սարկավագ Հովհաննես Ավետիսյանը։

Փաշինյանը և նրա կողմնակիցները ենթադրում են, որ Եկեղեցին դաշնակից է Ռուսաստանի հետ, և որ ընդդիմությունը Հայաստանը կտանի Ադրբեջանի հետ մեկ այլ պատերազմի։ Ընդդիմությունը մեղադրում է Փաշինյանին ժողովրդավարական նահանջի և Եկեղեցու անկախությունը խաթարելու փորձերի համար։

Փաշինյանը հաճախ իրեն ներկայացրել է որպես ժողովրդի մարդ։ Սակայն վերջին տարիներին նրա ժողովրդականությունը նվազել է՝ հարևան Ադրբեջանի դեմ մի շարք ռազմական պարտություններից հետո։ Հայերի միայն մոտ 20 տոկոսն է վստահում 50-ամյա տղամարդուն։

Միլիարդատեր ընդդիմադիր առաջնորդ Սամվել Կարապետյանի եղբորորդի Նարեկ Կարապետյանը AFP-ին հայտնել է, որ իր հորեղբայրն այժմ «քաղաքական բանտարկյալ» է, և մեղադրել է կառավարությանը կրոնական առաջնորդներին հետապնդելու համար։

Փաշինյանը հերքում է, որ Հայաստանում կան քաղբանտարկյալներ, և ապրիլին Սամվել Կարապետյանին, որն ունի Ռուսաստանի, Կիպրոսի և Հայաստանի քաղաքացիություն, անվանել է «օտարերկրյա գործակալ»։