Չինաստանում հայտարարվել է վտանգի «նարնջագույն» մակարդակ՝ թայֆունի պատճառով

Չինաստանի ազգային օդերևութաբանական կենտրոնը (NMC) երկարաձգել է այս տարվա 9-րդ թայֆունի՝ «Բավի»-ի հետևանքով վտանգի «նարնջագույն» մակարդակը, որը, ինչպես սպասվում է, կբերի առատ տեղումներ և ուժեղ քամիներ։

Ուրբաթ առավոտյան ժամը 8-ի դրությամբ «Բավի» թայֆունի կենտրոնը գտնվել է Չինաստանի արևելքում գտնվող Չժեցզյան և Ֆուցզյան նահանգների միջև սահմանից մոտավորապես 1020 կիլոմետր հարավ-արևելք, իսկ կենտրոնի մոտ քամու առավելագույն արագությունը հասնում է վայրկյանում 42 մետրի։

Կանխատեսվում է, որ «Բավի»-ն կշարժվի դեպի հյուսիս-արևմուտք 15-20 կմ/ժ արագությամբ և շաբաթ երեկոյան կհասնի Ֆուցզյան նահանգի Սիապու և Չժեցզյան նահանգի Վենլին քաղաքների միջև ընկած ափամերձ գոտի։

Ցամաք դուրս գալուց հետո այն կշարունակի շարժվել դեպի հյուսիս-արևմուտք՝ աստիճանաբար թուլանալով։ Սպասվում են փոթորկային քամիներ։ Բնակիչներին խորհուրդ է տրվում խուսափել լեռնային տարածքներից, գետահովիտներից և երկրաբանական վտանգների ենթարկված այլ վայրերից։

Հիշեցնենք, որ Չինաստանն ընդունել է եղանակային չորս մակարդակի նախազգուշացման համակարգ, որտեղ կարմիրն ամենաբարձր մակարդակն է, որին հաջորդում են նարնջագույնը, դեղինը և կապույտը։