Կիսամութ ու կիսածարավ մայրաքաղաք․ Կիևում Հոսանքի, ջրի ու ինտերնետի խնդիր կա

Էլեկտրաէներգիայի վթարային անջատումներ են սկսվել Կիևում և Կիևի մարզում․ գրում են ռուսական լրատվամիջոցները՝ հղում անելով «Դոնբասի վառելիքաէներգետիկ ընկերություն» էներգետիկ հոլդինգի տարածած հաղորդագրությանը։

«Կիև և Կիևի մարզ․ «Ուկրէներգո» ազգային էներգետիկ ընկերության հրահանգով կիրառվել են վթարային անջատումներ»,- ասված է ընկերության Telegram-ի ալիքում։

Նախօրեին Կիևի քաղաքապետ Վիտալի Կլիչկոն հայտնել էր, որ քաղաքը մասամբ մնացել է առանց լույսի ու ջրի։ Նրա խոսքով՝ էլեկտրամատակարարման խափանման պատճառով մայրաքաղաքի ջրամատակարարման պոմպակայանների մի մասը մնացել է առանց հոսանքի, իսկ քաղաքի աջափնյա հատվածում ջրի մատակարարումը խաթարվել է։

Ուկրաինական «Տելեգրաֆ» պարբերականն իր Telegram-յան ալիքում հայտնել է, որ խափանումները տեղի են ունեցել պայթյունից հետո։

«Страна.ua» լրատվամիջոցի փոխանցմամբ էլ՝ Ուկրաինայի մայրաքաղաքում խնդիրներ են առաջացել նաև ինտերնետի հետ։