ԱՄՆ-ն փորձում է ռազմավարական ներկայություն ապահովել նաև Կենտրոնական Ասիայում
Ամերիկյան ընկերությունները պատրաստվում են հայտարարել Ուզբեկստանի հետ նոր համաձայնագրերի մասին, քանի որ Վաշինգտոնը ձգտում է ընդլայնել իր տնտեսական ներկայությունը Կենտրոնական Ասիայում և դիվերսիֆիկացնել կարևորագույն հանածոների մատակարարումը․ Euronews-ի հետ զրույցում նշել է ԱՄՆ պետքարտուղար Մարկո Ռուբիոն։
Սամարղանդ կատարած այցի ընթացքում Ռուբիոն հայտարարել է, որ այս համաձայնագրերը կարող են նշանավորել ԱՄՆ-ի ավելի լայնածավալ ներգրավվածության սկիզբը տարածաշրջանում, որը, նրա կարծիքով, բավարար չափով չի ներկայացվել ամերիկյան քաղաքական գործիչների կողմից։
Ռուբիոյի խոսքով՝ Սամարղանդում ներկայացված են մոտ 300 ամերիկյան ընկերություններ, որոնք քննարկում են միլիարդավոր դոլարների հնարավոր արժողությամբ համաձայնագրեր։
Ռուբիոն հանքանյութերը նշել է որպես Ուզբեկստանի հետ համագործակցության պոտենցիալ ոլորտ։
Նրա խոսքով՝ 21-րդ դարը ձևավորող արդյունաբերություններն ու տեխնոլոգիաները գնալով ավելի կախված են դառնում կարևորագույն հանքանյութերից։ Հետևաբար, մատակարարման շղթաների դիվերսիֆիկացումը դառնում է միջազգային առաջնահերթություն։
Նա հավելել է, որ ռեսուրսներով հարուստ երկրների համար պատասխանատու հանքարդյունաբերությունը և հումքի վերամշակման օբյեկտների ստեղծումը կարող են ծառայել իրենց սեփական տնտեսական շահերին։
Անդրադառնալով ուկրաինական կողմի պնդմանը, թե ԱՄՆ-ն ժամանակավորապես դադարեցրել է ռուսական հրթիռային հարվածների մասին նախազգուշացնելու համար օգտագործվող հետախուզական տվյալների փոխանակումը, Ռուբիոն ընդգծել է․ «Դադար չի եղել»։
