Էստոնիայում առաջարկում են Ռուս ուղղափառ եկեղեցին ճանաչել որպես ահաբեկչական կազմակերպություն
Էստոնիայի ներքին գործերի նախարար Լաուրի Լյաենեմեցը հայտարարել է, որ առաջարկելու է Մոսկվայի պատրիարքությունը հայտարարել ահաբեկչական կազմակերպություն։ Դրա նպատակն է արգելել Ռուս ուղղափառ եկեղեցու գործունեությունը Էստոնիայում։ «Մենք պետք է հասկանանք, որ այսօր Մոսկվայի պատրիարքությունը ենթարկվում է Վլադիմիր Պուտինին, որն ըստ էության ղեկավարում է ահաբեկչական գործունեությունն աշխարհում»,- հավելել է նա։
«Դա չի ազդի ծխական համայնքների վրա և չի նշանակում, որ եկեղեցիները կփակվեն, բայց նշանակում է, որ Մոսկվայի հետ հաղորդակցությունը կդադարեցվի», – ասել է Լյաենեմեցը: Ռուս ուղղափառ եկեղեցին Էստոնիայում ավելի քան 100 հազար ծխական ունի․ հիշեցնում է էստոնական ERR պարբերականը:
Մոսկվայի պատրիարքարանի Էստոնական ուղղափառ եկեղեցու ներկայացուցիչն ավելի վաղ հայտարարել էր, որ իրենք ուղղակիորեն չեն ենթարկվում Մոսկվայի պատրիարքությանը և չեն կարող պատասխանատվություն կրել պատերազմին աջակցող հայտարարությունների համար։
Նախարարը հիշեցրել է, որ Էստոնիայի խորհրդարանն ավելի վաղ Ռուսաստանը որպես ահաբեկչական պետությու էր ճանաչել և Ռուս ուղղափառ եկեղեցին համեմատել էր իսլամական ահաբեկիչների հետ, որոնք պատերազմ են մղում արևմտյան արժեքների դեմ։
