Վաշինգտոնի հիմնական հետաքրքրությունը ոչ թե հայկական հանքանյութերն են, այլ Հարավային Կովկասով նոր եվրասիական երթուղու ստեղծումը․ մամուլի ամփոփում
ԱՄՆ-ի ու Հայաստանի միջև կնքված հազվագյուտ մետաղների վերաբերյալ գործարքը մեծ աղմուկ է բարձրացրել։ Սակայն, դատելով բաց աղբյուրներից, խոսքը Հայաստանի «հսկայական» պաշարների մասին չէ։ ԱՄՆ-ն ձգտում է ստեղծել միջանցք, որի միջոցով ռեսուրսներ կստանա ավելի հարուստ Կենտրոնական Ասիայի երկրներից։ Այս շղթայում Հայաստանին տրվում է տարանցիկ երկրի դերը, մինչդեռ դաշնակիցներին և առկա շուկաները կորցնելու սեփական ռիսկերը լիովին անտեսվում են․ գրում է EADaily-ն։
Ինչպես նշվում է, Վաշինգտոնի հիմնական հետաքրքրությունը ոչ թե հայկական հանքային պաշարներն են, այլ Հարավային Կովկասով նոր եվրասիական երթուղու ստեղծումը։
Հայաստանը հստակորեն ունի ԱՄՆ-ի համար կարևոր հանքանյութեր՝ մոլիբդեն, պղինձ և դրանց հետ կապված հազվագյուտ մետաղների տարրեր։ Սակայն երկիրը չունի հազվագյուտ մետաղների պաշարներ, որոնք համեմատելի են Չինաստանի, Ավստրալիայի կամ նույնիսկ Ղազախստանի պաշարների հետ։ Հետևաբար, միայն հայկական հանքարդյունաբերությունը դժվար թե բացատրի ամերիկյան հետաքրքրության այդքան կտրուկ աճը։
Կարևորագույն հանքանյութերի վերաբերյալ համաձայնագրի հետ միաժամանակ՝ ԱՄՆ-ն և Հայաստանը համաձայնագրեր են ստորագրել TRIPP միջանցքի վերաբերյալ։
Այսպիսով, հայկական հանքավայրերն ԱՄՆ-ի շատ ավելի մեծ աշխարհատնտեսական ռազմավարության միայն մի տարրն են՝ կարևորագույն և հազվագյուտ մետաղներ ապահովելու նպատակով նոր մատակարարման շղթաներ ստեղծելու համար։
Ավելի կարևոր է, որ Ռուսաստանի հետ համագործակցությունից հրաժարվելու վարչապետ Նիկոլ Փաշինյանի քաղաքականությունը շատ ռիսկային է։
КоммерсантЪ-ը գրում է, որ Հայաստանը 10 տարվա ընթացքում անցկացրեց իր առաջին լայնածավալ ռազմական շքերթը՝ նշելով 1918 թվականին հիմնադրված Առաջին Հանրապետության օրը: Իշխանությունները շքերթը ներկայացրին որպես երկրի իրական անկախության ապացույց: Ռազմական տեխնիկայի ցուցադրությունը Երևանի կենտրոնական հրապարակում՝ զուգորդված խաղաղության մասին ելույթներով, խթան էր Փաշինյանի համար խորհրդարանական ընտրություններին ընդառաջ: Շքերթը և դրա շեշտադրումը, անշուշտ, Փաշինյանին լրացուցիչ միավորներ կբերեն հունիսի 7-ի խորհրդարանական ընտրություններից առաջ:
