Սիրիայում անընդունելի է անկախ զինված խմբերի առկայությունը. Թուրքիայի ԱԳ նախարար 

Թուրքիայի արտաքին գործերի նախարար Հաքան Ֆիդանը հայտարարել է, որ Սիրիայում անընդունելի է, որ կենտրոնական կառավարությունից անկախ զինված խմբավորումներ գործողություն ծավալեն պետական ուժային կառույցների կողքին։ Այդ մասին նա ասել է Մյունխենում տեղի ունեցած Սիրիային նվիրված պանելային քննարկման ժամանակ։

«Մենք տեսնում ենք, որ Սիրիայի իշխանությունները ներկայումս ճիշտ քայլեր են ձեռնարկում զինված խմբերի միավորման ուղղությամբ։ Մեր կարծիքով՝ ՄԱԿ-ի անդամ ցանկացած երկրում միայն մեկ օրինական ուժային կառույց պետք է լինի։ Սիրիան պետք է ունենա իր սեփական զինված ուժերը, իր սեփական իրավապահ մարմինները, բայց նրանք պետք է կառավարելի լինեն և ենթարկվեն կառավարությանը։ Մենք չենք կարող հանդուրժել անկախ զինված ուժերի առկայությունը, անկախ նրանից՝ ինչի համար են պայքարում», – ասել է Ֆիդանը։

Նա ավելացրել է, որ «երկար ժամանակ տարածաշրջանի երկրներում զինված խմբավորումների առկայությունը միայն խառնաշփոթ է առաջացրել»։

«Այդ իսկ պատճառով՝ մարդկանց համար կարգուկանոն և անվտանգություն ապահովելու համար անհրաժեշտ է լուծել զինված խմբավորումների խնդիրը՝ դրանք ներառելով ազգային բանակի մեջ։ Կարծում եմ՝ այս գործընթացը ընթանում է։ Սա այն կարևոր հարցերից մեկն է, որի նկատմամբ մենք ուշադիր հետևում ենք», – նշել է Թուրքիայի ԱԳՆ ղեկավարը։