Իսրայելին անհանգստացնում է Ադրբեջան-Իրան կապերի խորացումը․ Tehran Times
Ադրբեջանն ու Իրանը խորացնում են իրենց ռազմավարական կապերն, ինչն ակնհայտորեն անհանգստացնում է Իսրայելի ռեժիմին։ Դա դրսևորվում է վարչապետ Նեթանյահուի շտապ հայտարարված այցով Ադրբեջան. գրել է Tehran Times-ը։
Ինչպես նշվել է, տարիներ շարունակ Թել Ավիվն Ադրբեջանին դիրքավորում էր որպես Իրանին «զսպելու» իր արշավի հենասյուն՝ օգտագործելով զենքի վաճառքը (որը 1990-ականներից ի վեր ապահովում է Բաքվի պաշտպանական ներմուծման ավելի քան 60%-ը) և Իրանի սահմանների մոտ հետախուզական փոխանակման կառույցները։
Պարբերականն ընդգծել է, որ 2020 թվականի Լեռնային Ղարաբաղի հակամարտությունը բացահայտել է «բաժանիր և տիրիր» մոտեցման սահմանները։ Մինչդեռ Ադրբեջանը տոնում էր իր ռազմական հաջողությունները Թուրքիայի և Իսրայելի աջակցությամբ, հետագա տարածաշրջանային անկայունությունն ընդգծել է արտաքին գործոններից չափազանց կախվածության ռիսկերը։
Միևնույն ժամանակ, Իրանի ուշադրությունը ենթակառուցվածքների վրա, ինչպիսիք են Հյուսիս-Հարավ տրանսպորտային միջանցքի ընդլայնումը՝ Կովկասը Պարսից ծոցին միացնելու համար, սպառնում է մարգինալացնել Իսրայելի «ծայրամասային դոկտրինը», որը հիմնված է Թեհրանը թշնամական հարևաններով շրջապատելու վրա։
Բացի այդ՝ Փեզեշքիանի՝ Իսլամական հեղափոխության առաջնորդ այաթոլլահ Սեյեդ Ալի Խամենեիի հետ այցելությունից առաջ ունեցած խորհրդակցությունները պարզապես ձևականություն չէին։
Ավելի վաղ The Times Israel-ը, հղում անելով Իսրայելի վարչապետ Բենիամին Նեթանյահուի գրասենյակին, գրել էր, որ նա մայիսի 7-ին կմեկնի Ադրբեջան։ Նեթանյահուն կվերադառնա մայիսի 11-ին՝ Հրեական շաբաթն արտերկրում անցկացնելուց հետո, ինչպես գրեթե միշտ անում է իր պաշտոնական այցերի ժամանակ։
Մայիսի 8-ին Նեթանյահուն կհանդիպի նախագահ Իլհամ Ալիևի և հրեական համայնքի անդամների հետ։
Ադրբեջանը Հաագայի Միջազգային քրեական դատարանի անդամ չէ, ուստի՝ Նեթանյահուի ձերբակալման վտանգ չկա։
Հիշեցնենք, որ Իրանի նախագահն Ադրբեջանում էր ապրիլի 28-ին։ Այցի արդյունքների վերաբերյալ համատեղ հայտարարությունից բացի, որոնք ստորագրվել են նախագահների, Իրանի և Ադրբեջանի համապատասխան պաշտոնյաների կողմից, ստորագրվել են նաև փոխըմբռնման յոթ հուշագրեր քաղաքական խորհրդատվությունների, տրանսպորտի, մշակութային փոխանակումների, առողջապահության, զանգվածային լրատվության և ներդրումների ոլորտներում:
