ՀՀ-ում առաջիկա խորհրդարանական ընտրությունները կարող են գոյաբանական բնույթ կրել. Common Space
Հաջորդ տարվա խորհրդարանական ընտրություններից առաջ Հայաստանում լարվածությունը մեծանում է, և երկրի ապագան կախված է մազից։ Չնայած օգոստոսին Թրամփի միջնորդությամբ ընդունված վաշինգտոնյան հռչակագրի շուրջ ստեղծված ոգևորությանը՝ պարզ չէ, թե արդյո՞ք այն կարող է հաղթահարել 44-օրյա պատերազմում Ադրբեջանի կողմից պարտությունից հետո պահպանվող պառակտումը. գրում է Common Space-ը:
Ինչպես նշվում է, անցած շաբաթավերջին ռուսաստանաբնակ հայ միլիարդատեր Սամվել Կարապետյանի կողմնակիցները դուրս էին եկել Երևանի և Էջմիածնի փողոցներ։ Կարապետյանին մեղադրում են Փաշինյանի կառավարությունը տապալելու կոչ անելու համար, չնայած շատերը կարծում են, որ նրա կալանքն անհիմն էր և քաղաքական դրդապատճառներ ուներ՝ առաջիկա ընտրությունների պատճառով։ Փաշինյանը նաև ձգտում է երկրում ստեղծել «Չորրորդ Հանրապետություն»՝ «իր նախորդների՝ Ռոբերտ Քոչարյանի և Սերժ Սարգսյանի կառավարման էջը շրջելու և հարևանների հետ ավելի քան երեք տասնամյակ տևած հակամարտությանը վերջ դնելու համար»։
Նշվում է, որ նման քայլը կապահովի Փաշինյանի քաղաքական ապագան: Խնդիրն այն է, որ Փաշինյանի ժողովրդականությունն աներևակայելի ցածր է։ Նա բախվում է աճող մարտահրավերների։ 2023 թվականին նրա «Քաղաքացիական պայմանագիր» կուսակցությունը գրեթե կորցրել է Երևանը։ Իսկ 2025 թվականի մարտին այն կորցրել է երկրորդ ամենամեծ քաղաքը՝ Գյումրին, ինչպես նաև մայրաքաղաքից դուրս գտնվող Փարաքար համայնքը։ Ի դեպ, սեպտեմբերին Փարաքարի ընդդիմադիր քաղաքապետը սպանվել է պաշտոնը ստանձնելուց ընդամենը հինգ ամիս անց, չնայած ենթադրվում է, որ սպանությունը կատարվել է անձնական թշնամանքի, այլ ոչ թե քաղաքական դրդապատճառներով։
Common Space-ը նաև նշում է, որ երկուշաբթի Գյումրու ընդդիմադիր քաղաքապետ Վարդան Ղուկասյանը ձերբակալվել է ոստիկանության կողմից իրականացված դրամատիկ ստուգումների ժամանակ, որն ակնհայտորեն քաղաքական էր։
Այս ամսվա սկզբին քաղաքի գլխավոր հոգևորականն արդեն դատապարտվել է երկու տարվա ազատազրկման՝ պետական հեղաշրջման մեղադրանքով։
Կայքը նկատում է, որ Փաշինյանի պայքարը տեղական ինքնակառավարման մարմինների դեմ նորություն չէ: Հայաստանի երրորդ ամենամեծ քաղաք Վանաձորն արդեն չորս տարի է՝ քաղաքապետ չունի: Հաջորդ ամիս Էջմիածնում՝ կաթողիկոսի նստավայրում, նախատեսվում են տեղական ինքնակառավարման մարմինների ընտրություններ, որոնք կարող են ևս մի փորձություն լինել վարչապետի ընտրական հնարավորությունների համար: Դա կարող է նաև ցույց տալ, թե արդյո՞ք ներքին քաղաքականության մեջ բռնության նկատմամբ ավանդական հակումները դեռևս պահպանվում են։
Դեռևս անցյալ տարի պարզ էր, որ առաջիկա խորհրդարանական ընտրությունները կարող են գոյաբանական բնույթ կրել։ Թեև հասկանալի է, որ դիմակայությունն անխուսափելի է, արդյունքն անկանխատեսելի է։ Հնարավոր է, որ Փաշինյանն այժմ փորձում է կանխել հետագա անկարգությունները՝ դրանք շուտափույթ կերպով խափանելով։
