Հայաստանի և Ռուսաստանի միջև լարվածությունը սրվում է․ The European Conservative
The European Conservative-ն անդրադարձել է Հայաստանի և ՌԴ-ի հարաբերություններում նկատվող լարվածությանը։
Ինչպես նշվում է, ՀՀ վարչապետ Նիկոլ Փաշինյանը մերժել է Ռուսաստանի նախագահ Վլադիմիր Պուտինի առաջարկը՝ «մեղմ, խելացի և փոխշահավետ ամուսնալուծության» վերաբերյալ։
Մամուլի ասուլիսում Փաշինյանը մերժել է այն միտքը, որ Հայաստանը պետք է ընտրություն կատարի Եվրամիության հետ ավելի սերտ կապերի և Ռուսաստանի գլխավորած Եվրասիական տնտեսական միությանը (ԵԱՏՄ) անդամակցության միջև։
Պուտինն ավելի վաղ առաջարկել էր Հայաստանին նման քվեարկություն անցկացնել՝ որոշելու համար, թե արդյո՞ք այն ավելի սերտ հարաբերություններ պետք է կառուցի ԵՄ-ի հետ, թե՞ մնա Մոսկվայի տնտեսական ուղեծրում՝ զգուշացնելով, որ Ռուսաստանը եզրակացություններ կանի արդյունքների հիման վրա։
Կայքն ընդգծում է, որ վերջին իրադարձությունները տեղի են ունեցել ամիսներ շարունակ սրվող լարվածության հետևանքով։
Ապրիլին Հայաստանն ազդանշան է տվել, որ կարող է վերանայել իր անդամակցությունը Ռուսաստանի գլխավորած դաշինքներին, ինչպիսին են ԵԱՏՄ-ն և Հավաքական անվտանգության պայմանագրի կազմակերպությունը (ՀԱՊԿ), այն բանից հետո, երբ Մոսկվան զգուշացրեց ԵՄ-ի և Միացյալ Նահանգների հետ ավելի սերտ համագործակցության հետևանքների մասին։
