Փաշինյանը մանևրում է՝ ճնշելով ընդդիմությանը և շարունակելով մոլորեցնել ընտրողներին․ Զատուլին
ՀՀ վարչապետ Նիկոլ Փաշինյանի հայտարարությունն այն մասին, որ Երևանը չի վիճի Մոսկվայի հետ երկու երկրների չափերի անհամապատասխանության պատճառով, պարզապես արտաքին քաղաքականության փոփոխությունը քողարկելու փորձ է․ Lenta.ru-ի հետ զրույցում նշել է Պետդումայի ԱՊՀ հարցերով հանձնաժողովի նախագահի առաջին տեղակալ Կոնստանտին Զատուլինը։
Խորհրդարանականի խոսքով՝ եթե խստորեն հետևենք ՀՀ վարչապետի տրամաբանությանը, ապա հետևում է, որ նա խուսափում է Ռուսաստանի հետ կոնֆլիկտից ոչ թե դաշնակցային պարտավորությունների կամ տնտեսության և անվտանգության համար երկկողմ կապերի կարևորության ըմբռնման պատճառով, այլ զուտ՝ մասշտաբի։
«Եթե մասշտաբն ավելի մեծ լիներ, Փաշինյանը վաղուց մեզ կդավաճաներ»,- նշել է Զատուլինը։
Խորհրդարանականն ընդգծել է, որ խնդիրը հիպոթետիկ պատերազմը չէ, այլ Հայաստանի կողմնորոշման հետևողական փոփոխությունը։
«Ինչպե՞ս կարող են հարաբերությունները նորմալ լինել, եթե նա չի թաքցնում ԵՄ-ին միանալու իր մտադրությունը: Սա պարզապես հայտարարություն չէ, սա օրենք է, որն ընդունվել է խորհրդարանի անդամների կողմից գրեթե 2 տարի առաջ՝ առանց ԵՄ-ից որևէ հրավերի: Այժմ՝ նախընտրական քարոզարշավի ընթացքում քննադատության ծանրության տակ, նա մանևրում է՝ ճնշելով ընդդիմությանը և շարունակելով մոլորեցնել ընտրողներին», – հավելել է Զատուլինը:
