TRIPP-ի իրականացումը կախված է Հայաստանից ու Ադրբեջանից շատ ավելի հեռու տարածվող քաղաքական ու ռազմավարական համաձայնագրերից․ CACI
Ներկայում Հայաստանն ու Ադրբեջանը սահմանափակ հնարավորություններ ունեն TRIPP-ի իրականացումն անկախ առաջ մղելու համար. գրում է Central Asia-Caucasus Institute վերլուծական կենտրոնը։
Ինչպես նշվում է, ԱՄՆ-ի և Իրանի միջև հնարավոր բանակցությունների արդյունքը և, ի վերջո, ռազմական գործողությունների դադարեցումը կարող են կարևոր դեր խաղալ նախագծի ապագայի համար: Եթե կողմերը ձգտեն դիվանագիտական կարգավորման, TRIPP-ը կարող է Վաշինգտոնի և Թեհրանի միջև կնքված ավելի լայն համաձայնագրերի փաթեթի մաս կազմել:
Ռուսական գործոնը նույնպես բարդ է: Մոսկվան կարող է փոխհատուցում պահանջել Հայաստանի երկաթուղային ենթակառուցվածքներում իր ներդրումների համար, ինչը զգալի բեռ է Հայաստանի համար, կամ պահանջել նախագծին մասնակցության որևէ ձև: Վերջինս Վաշինգտոնին կդնի ռազմավարական դիլեմայի առաջ. արդյոք համաձայնեցնե՞լ Ռուսաստանի ներգրավվածությունը տրանսպորտային միջանցքում, որի ավելի լայն աշխարհաքաղաքական հիմնավորումը ներառում է Ռուսաստանից տարածաշրջանային կախվածության նվազեցում:
Երկու դեպքում էլ Թրամփի վարչակազմը պետք է էական բանակցություններ վարի Մոսկվայի հետ՝ համաձայնեցնելով փոխհատուցումը կամ որոշելով նախագծին Ռուսաստանի հնարավոր մասնակցության պայմանները: Հետևաբար, TRIPP-ի իրականացումը կախված է քաղաքական և ռազմավարական համաձայնագրերի ավելի լայն շրջանակից, որոնք տարածվում են Հայաստանից և Ադրբեջանից շատ ավելի հեռու: Առանց նման պայմանավորվածությունների՝ երթուղին կշարունակի պարունակել զգալի աշխարհաքաղաքական և անվտանգային ռիսկեր, հնարավոր է՝ խաթարելով դրա գրավչությունը Կենտրոնական Ասիայի և Եվրոպայի միջև ապրանքներ տեղափոխելու հուսալի ուղիներ փնտրող բիզնեսների համար:
