250 հազար դոլարի գույք ունեինք, առանց տեղեկացնելու քանդեցին. սրճարանի տերը՝ Սարյանի պուրակում ապամոնտաժված շինության մասին․ լուսանկարներ

Երևանի քաղաքապետարանի աշխատակիցներն այսօր քանդել են Սարյան պուրակում՝ Զորյան 1/1 հասցեում գտնվող սրճարանը։ Քայլը քաղաքապետարանը հիմնավորում է այն հանգամանքով, որ շինությունն ինքնակամ է կառուցված և գտնվում է համայնքային հողի վրա։

Սրճարանի տնօրեն Նարինե Վարդանյանն ABC media-ի հետ զրույցում պատմել է, որ օբյեկտը գործում է 1996 թվականից։ Նա նշել է՝ 2015 թվականին վարձակալության պայմանագիրն ավարտվել է, սակայն կողմերը պայմանավորվել են այն երկարաձգել: Այդ ժամանակ քաղաքապետարանն առանց տեղեկացնելու վերցրել է պայմանագիրը և համարել այն անվավեր։ Վարդանյանի խոսքով՝ նրանք դիմել են դատարան, և դատարանը գտել է, որ կոնկրետ խախտումներ են եղել, ինչի արդյունքում պայմանագիրը երկարացվել է։

Վարդանյանի խոսքով՝ նոր իշխանությունների՝ 2021-ին պայմանագիրը չերկարացնելու որոշումից հետո սկսվել է նոր դատական գործընթաց։ Պայմանագիրը դեռևս գրանցված է կադաստրում և իրավական ուժը կորցրած չէ։

«Երեկ երեկոյան քաղաքապետարանը որոշում կայացրեց, և այսօր առանց տեղեկացնելու եկան ու քանդեցին։ Մեզ զանգահարել են տարածքում գտնվող ծաղկի խանութից և ասել, որ այսպիսի բաներ են կատարվում։ Մենք մոտ 250,000 դոլարի գույք ունեինք։ Դիմելու ենք դատարան, վարչապետին, եթե պետք լինի՝ մինչև Եվրոպական դատարան։ Սենց հեշտ չի մարդկանց տեռորի ենթարկել», – նշում է Վարդանյանը։

Դեպքի վայրում Նարինե Վարդանյանի ինքնազգացողությունը վատացել էր, և նրան օգնություն ցուցաբերելու համար կանչվել է շտապ օգնություն։