Թրամփն իր ուղերձում կրկին չօգտագործեց «ցեղասպանություն» եզրույթը
Միացյալ Նահանգների նախագահ Դոնալդ Թրամփը ուղերձ է հղել Ցեղասպանության 111-րդ տարելիցի կապակցությամբ, որը ներկայացնում ենք ստորև․
«Այսօր մենք հարգանքի տուրք ենք մատուցում անթիվ հայերի հիշատակին, որ աքսորվեցին և դաժանաբար սպանվեցին Մեծ Եղեռնի տարիներին: Հիշատակի այս օրը մենք անսասան համերաշխություն ենք հայտնում յուրաքանչյուր ամերիկահայի և աշխարհասփյուռ հայությանը՝ ոգեկոչելով ավելի քան 100 տարի առաջ տեղի ունեցած կործանարար իրադարձությունները, որոնք այսօր էլ շարունակում են ապրել այդ համայնքների հավաքական հիշողության մեջ:
Մարդկության պատմության այս սթափեցնող էջը հավերժ կմնա հայ ժողովրդի անկոտրում ոգու և Քրիստոնեության հիմքում ընկած հույսի վկայություն: Մենք հարգանքի տուրք ենք մատուցում անցյալի հսկայական ողբերգությունները հաղթահարելու և ավելի մեծ ապագա կերտելու հայերի ցուցաբերած կամքին, որը ենթադրում է երկարատև բարգավաճում, անվտանգություն և խաղաղություն․ մենք նեցուկ կկանգնենք նրանց։
Միացյալ Նահանգները և Հայաստանը կշարունակեն աշխատանքն ավելի անվտանգ և բարգավաճ աշխարհ կառուցելու ուղղությամբ։ Իմ վարչակազմն ամրապնդում է մեր ռազմավարական գործընկերությունը՝ նշանակալի հնարավորություններ հայ ժողովրդի համար ստեղծելով և Հարավային Կովկասի տարածաշրջանում երկարատև կայունություն խթանելով։
Այժմ ամերիկացիներն ու հայերը կողք-կողքի կանգնած են պատմական Խաղաղության խորհրդում՝ միավորված մեր նպատակի շուրջ՝ ուժի միջոցով խաղաղության նոր դարաշրջան սկսելու գործում։
Հայոց հիշատակի այս օրը, երբ մենք սգում ենք Մեծ Եղեռնի ողբերգության ժամանակ զոհված անմեղ հոգիների համար, վերահաստատում ենք մեր սուրբ կոչը պաշտպանելու անմեղներին, առաջ մղելու բոլոր ժողովուրդների միջև խաղաղության գործը և մշակելու խոր երկյուղածություն Ամենակարող Աստծո հանդեպ, որը զորավիգ է լինում մեզ յուրաքանչյուր փորձության և հաղթանակի ժամանակ և որը մեզ պահում է յուրաքանչյուր փորձության և հաղթանակի ընթացքում»։
